काठमाडौं, माघ ११ – नेपालले पाकिस्तानसँग व्यापार, लगानी, र पर्यटनका क्षेत्रहरूमा सहकार्यलाई विस्तार गर्न ठोस पहल गरेको छ।
उद्योग, वाणिज्य तथा आपूर्तिमन्त्री दामोदर भण्डारीले पाकिस्तानी राजदूत अब्रार एच हश्मीसँग भएको भेटमा दुवै देशबीच व्यापार सहजीकरण र आर्थिक साझेदारीलाई अघि बढाउन आग्रह गर्नुभएको छ।
भेटका क्रममा मन्त्री भण्डारीले नेपाल र पाकिस्तानबीचको द्विपक्षीय सम्बन्धलाई थप मजबुत बनाउन नेपाल-पाकिस्तान संसदीय मैत्री समूहको स्थापना र दुई मुलुकबीचको आर्थिक आयोग तथा राजनीतिक परामर्श संयन्त्रलाई सक्रिय राख्ने विषयमा जोड दिनुभयो।
उहाँले भन्नुभयो, “दुई देशबीचको व्यापार घाटा कम गर्न र आर्थिक सहकार्यलाई बढावा दिन नयाँ सम्झौताका लागि समय आएको छ। विशेषगरी कपडा, कृषि, पर्यटन, र जलविद्युत् क्षेत्रमा पाकिस्तानी लगानीकर्तालाई नेपालमा लगानी गर्न प्रोत्साहित गर्न चाहन्छौं।”
मन्त्री भण्डारीले नेपालका उत्पादनहरू पाकिस्तानमा भन्सार शुल्क र आयात प्रक्रियाका चुनौतीहरूको सामना गरिरहेको उल्लेख गर्दै ती समस्याहरू समाधान गर्न र व्यापार सहजीकरणका लागि पहल गर्न पाकिस्तानी पक्षलाई अनुरोध गर्नुभयो।
पाकिस्तानी राजदूत हश्मीले नेपाल र पाकिस्तानबीच व्यापारिक सम्बन्धलाई सुदृढ गर्न आफ्नो सरकार तयार रहेको बताउनुभयो। उहाँले नेपालका चिया र कफी पाकिस्तानमा राम्ररी निर्यात भइरहे पनि ब्राण्डिङ र गुणस्तर सुधार गर्नुपर्नेमा जोड दिनुभयो। साथै, दोहोरो करको समस्या समाधान गरेर व्यापार प्रवाहलाई सहज बनाउन आवश्यक रहेको धारणा राख्नुभयो।
दुवै पक्षले पर्यटन प्रवर्द्धनका लागि ठोस योजनाहरू अघि सार्ने सहमति गरेका छन्। पाकिस्तानी राजदूतले काठमाडौं-लाहोर सिधा हवाई उडानका लागि पहल गर्ने र सगरमाथा तथा केटु हिमाल जोड्ने पर्यटकीय मार्ग निर्माण गर्ने प्रस्ताव राख्नुभयो।
यसैगरी, कृषि, पर्यटन, र संस्कृति सम्बन्धी संयुक्त कार्य समूहहरूको नियमित बैठक आयोजना गर्ने र छात्रवृत्ति कार्यक्रम विस्तार गरेर दुई देशबीचको शैक्षिक सहकार्यलाई बढाउने विषयमा पनि छलफल भएको छ।
दुवै पक्षले व्यापार सहजीकरणका साथै जनता-जनताबीचको सम्बन्धलाई अझ प्रगाढ बनाउन सहकार्य गर्ने प्रतिबद्धता जनाएका छन्।
– नेपाल खोज खबर
