चितवन । नेकपा (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले संविधान, समावेशिता, र सङ्घीयताको रक्षा गर्न सबैले आ–आफ्नो स्थानबाट आवाज उठाउनुपर्ने आवश्यकता औंल्याउनुभएको छ।
चितवनको माडीस्थित सोमेश्वर माध्यमिक विद्यालयको स्वर्ण महोत्सव समारोहलाई सम्बोधन गर्दै अध्यक्ष दाहालले जनताको प्राप्त उपलब्धिको रक्षा गर्न सरकार र नागरिक समाजको भूमिकामा जोड दिनुभयो। उहाँले सरकारलाई नियमित रूपमा संसद् बोलाएर विधेयक ल्याउन आग्रह गर्दै संविधानको मर्म विपरीत अध्यादेश ल्याउनु अनुचित रहेको टिप्पणी गर्नुभयो।
“सदनलाई बेवास्ता गर्दै अध्यादेश ल्याउनु लोकतन्त्र र संविधानको मर्म विपरीत हो,” उहाँले भन्नुभयो। “संविधान र लोकतन्त्रको भावना अनुरूप अघि बढ्न सरकारको कर्तव्य हो।”
शैक्षिक क्षेत्रको विषयमा बोल्दै अध्यक्ष दाहालले सामुदायिक विद्यालयहरूको शैक्षिक गुणस्तर सुधारका लागि अभिभावक, जनप्रतिनिधि, र शिक्षकहरूको संयुक्त प्रयास आवश्यक रहेको बताउनुभयो।
कार्यक्रममा बागमती प्रदेशसभा सदस्य ठाकुर ढकाल, माडी नगरपालिकाका प्रमुख ताराकुमारी काजी महतो, र विद्यालय व्यवस्थापन समितिका अध्यक्ष लेखबहादुर गुरुङलगायतले पनि आ–आफ्ना धारणा राखेका थिए।
