काठमाडौ -होली पर्व मनाउने क्रममा अवाञ्छित गतिविधि गरेको आरोपमा काठमाडौँबाट दुई महिलासहित १२ जनालाई प्रहरीले पक्राउ गरेको छ। उनीहरूले अन्य व्यक्तिको इच्छाविपरीत लोला हान्ने र रङ दल्ने जस्ता क्रियाकलाप गरेको आरोप लागेको छ। पक्राउ परेका व्यक्तिहरूलाई कसुरको प्रकृति हेरेर मुद्दा चलाउने वा छाड्नेबारे निर्णय गरिने प्रहरीले जनाएको छ।
होली पर्वलाई मर्यादित र सुरक्षित बनाउन काठमाडौँ उपत्यकामा २,७०० भन्दा बढी प्रहरी परिचालन गरिएको छ। यस क्रममा, मादक पदार्थ सेवन गरी सवारी साधन चलाउनेहरूलाई नियन्त्रणमा लिन चेकजाँचमा कडाइ गरिएको छ। प्रहरीले होली खेल्दा अनुशासित र मर्यादित हुन आग्रह गर्दै, जोखिमपूर्ण स्थानमा होली नखेल्न अनुरोध गरेको छ।
