काठमाडौँ-क्रिकेटर सन्दीप लामिछाने हर्नियाको शल्यक्रिया गरेपछि अस्पतालबाट डिस्चार्ज भएका छन्। सिल्भर लाइन अस्पतालले उनलाई आज घर पठाएको हो। सन्दीपले गत ९ गते हर्नियाको शल्यक्रिया गराएका थिए र हाल स्वास्थ्य सुधार हुँदै गएको अस्पतालका प्रबन्धक डा. अभिषेकराज सिंहले जानकारी दिए।
शल्यक्रिया टोलीको नेतृत्व डा. दीपक शर्माले गरेका थिए। सन्दीप चार वर्षदेखि हर्नियाको समस्याबाट पीडित थिए र अब रिकभर भइरहेका छन्। डा. सिंहका अनुसार, यदि रिकभरी यस्तै गतिमा भयो भने, सन्दीप दुईदेखि तीन हप्ताभित्र मैदानमा फर्किन सक्ने छन्।
अस्पतालले विज्ञप्ति जारी गर्दै सन्दीपलाई शीघ्र स्वास्थ्य लाभको शुभकामना दिएको छ। नेपाल क्रिकेट संघ (क्यान) का उपाध्यक्ष रोशन सिंहले डिस्चार्जका क्रममा अस्पतालमा पुगेर सन्दीपको स्वास्थ्य सम्वन्धी जानकारी लिएका थिए।
