राष्ट्रिय स्वतन्त्र पार्टीका सभापति रवि लामिछानेको बयान आज जिल्ला अदालत रुपन्देहीका न्यायाधीश प्रल्हाद कुमार योगीको ईजलासमा हुन लागेको छ। गत माघ ६ गते जिल्ला सरकारी वकिल कार्यालयले सुप्रिम बचत तथा ऋण सहकारी संस्थाको रकम ठगी प्रकरणमा लामिछानेसहित २२ जनाविरुद्ध सहकारी ठगी र संगठित अपराधको मुद्दा दर्ता गरेको थियो।
मुद्दाको प्रतिवादका लागि लामिछाने अदालतमा उपस्थित भएका छन्। अदालतका ईजलास अधिकृतले बयानका लागि मिसिल अध्ययन गरिरहेकाले लामिछानेको बयान केही समयमा सुरु हुने बताएका छन्।
अदालतको वेबसाइटमा उल्लेख भए अनुसार, नारायण बहादुर पहराईको जाहेरीमा नेपाल सरकार वादी रहेको सहकारी ठगी र संगठित अपराध मुद्दामा रविना रिमालसहित २२ जना प्रतिवादी छन्।
सहकारी ठगीको प्रकरणमा लामिछाने र अन्य प्रतिवादीहरूसँग बयान लिने प्रक्रिया अदालतमा जारी रहेको छ।
