काठमाडौं- जल तथा मौसम विज्ञान विभाग, मौसम पूर्वानुमान महाशाखाले देशभर हाल पश्चिमी वायुको प्रभाव कायम रहेको जनाएको छ।
महाशाखाका अनुसार कर्णाली र सुदूरपश्चिम प्रदेशका पहाडी भूभागमा आंशिक बदली देखिएको छ भने अन्य भूभागमा मौसम सामान्यतया सफा रहेको छ। तराईका धेरै स्थानमा हुस्सु र कुहिरो लागेकाले जनजीवनमा असर परेको छ।
दिउँसो सफा मौसम, तर तराईमा सतर्कता आवश्यक
आज दिउँसो कोशी, मधेस, बागमती, गण्डकी, र लुम्बिनी प्रदेशमा मौसम मुख्यतया सफा रहने महाशाखाले जनाएको छ। तर, कर्णाली र सुदूरपश्चिम प्रदेशका केही भागमा आंशिक बदलीको सम्भावना छ।
हुस्सु र कुहिरोको असर
विशेषगरी बिहानको समयमा तराई र उपत्यकाका धेरै स्थानमा हुस्सु र कुहिरो लाग्न सक्ने भएकाले दैनिक जनजीवन, कृषि, स्वास्थ्य, यातायात, र हवाई सेवामा असर पर्न सक्ने चेतावनी दिइएको छ। यात्रुहरूलाई विशेष सतर्कता अपनाउन सुझाव दिइएको छ।
महाशाखाको अनुरोध
महाशाखाले मौसमका यी अवस्थाले सिर्जना गर्न सक्ने चुनौतीलाई ध्यानमा राख्दै सावधानी अपनाउन र मौसम सम्बन्धी थप जानकारीका लागि नियमित रूपमा महाशाखाको अद्यावधिक सूचनालाई पछ्याउन सबैमा आग्रह गरेको छ।
