झापा – कोशी प्रदेशका पूर्वमुख्यमन्त्री तथा नेपाली कांग्रेस कोशी प्रदेश संसदीय दलका नेता उद्धव थापामाथि झापाको सुरुङ्गा नजिक आक्रमण भएको छ। नेपाल प्रेस युनियन झापाले दोमुखामा आयोजना गरेको कार्यक्रममा सहभागी भएर फर्कने क्रममा उनीमाथि आक्रमण भएको हो।
आक्रमणका कारण थापाको निधारमा चोट लागेको छ। उपचारपछि उनी बिर्तासिटी अस्पतालबाट घर फर्किएका छन्।
झापा प्रहरीका प्रवक्ता डीएसपी कृष्णकुमार चन्दका अनुसार, आक्रमणमा संलग्न दुई जना नेपाल विद्युत् प्राधिकरणका कर्मचारी रहेका छन्। उनीहरूलाई प्रहरीले तत्कालै पक्राउ गरेको छ तर सुरक्षाका कारण नाम सार्वजनिक गरिएको छैन।
प्रहरीका अनुसार, निर्माणाधीन पूर्वपश्चिम राजमार्गमा भीआईपी गाडीले ओभरटेक गर्न खोज्दा विवाद सुरु भएको थियो। त्यसक्रममा बा १ ञ १८७० नम्बरको गाडीमा सवार विद्युत् प्राधिकरणका चालक र सहयोगीले थापामाथि आक्रमण गरेका थिए।
पक्राउ परेका व्यक्तिहरूमाथि कानुनी कारबाही प्रक्रिया अघि बढाइएको प्रहरीले जनाएको छ।
