- मुगुको छायाँनाथ मन्दिर दर्शन गर्न गएका १७ वर्षीय वसन्त बुढा लेक लागेर बिरामी परेका छन्।
- अक्सिजनको अभावमा श्वासप्रश्वासमा समस्या देखिएका किशोरको हाल स्वास्थ्य अवस्था मध्यम रहेको छ।
- सुरक्षाकर्मीको टोलीले उनलाई बोकेर उपचारका लागि स्वास्थ्य चौकीतर्फ ल्याउँदै छ।
रतन बहादुर रावल मुगु । छायाँनाथ मन्दिर दर्शनका लागि मुगु आएका जुम्लाका एक किशोर लेक लागेर (अक्सिजन अभावका कारण) गम्भीर बिरामी परेका छन् । जुम्ला जिल्ला पातारासी गाउँपालिका वडा नम्बर ५ बस्ने १७ वर्षीय वसन्त बुढा आइतबार साँझ लेक लागेर बिरामी भएका हुन् ।
जिल्ला प्रहरी कार्यालय मुगुका प्रहरी नायक उपनिरीक्षक रविराज थपलिया ले जानकारी दिनु भयो जि.प.का मुगुका अनुसार आज मिति २०८३ भदौ ७ गते बेलुकी अन्दाजी ७:४० बजेको समयमा मन्दिर दर्शन गर्ने क्रममा बुढालाई अचानक श्वासप्रश्वासमा समस्या देखिएको थियो । हाल उनको स्वास्थ्य अवस्था मध्यम रहेको जनाइएको छ ।
बिरामी किशोरको उद्धारका लागि छायाँनाथ मन्दिर दर्शन गर्न जाने भक्तजनहरूको सुरक्षार्थ खटिएका प्रहरी सहायक निरीक्षक (प्र.स.नि.) जनकराज पाण्डेको समन्वयमा तत्काल टोली परिचालन गरिएको छ । सशस्त्र प्रहरी सहायक हवल्दार गणेश बुढाको कमाण्डमा खटिएको प्रहरीसहित ७ जनाको टोलीले बिरामीलाई बोकेर स्वास्थ्य चौकीतर्फ ल्याइरहेको छ ।
बिरामीका आफन्त एवं नातामा दाजु पर्ने सशस्त्र प्रहरी जवान रमेश बुढा पनि उद्धार टोलीसँगै रहेका छन् । उद्धार टोली रहेको स्थानबाट उपचारका लागि पुलु स्वास्थ्य चौकी आइपुग्न पैदल अझै अन्दाजी ७ देखि ८ घण्टा लाग्ने जानकारी प्राप्त भएको छ । घटनाको थप विवरण आउन बाँकी छ ।
