काठमाडौँ – सर्वोच्च अदालतले दुर्गा प्रसाईँ सञ्चालक रहेका दुईवटा अस्पतालका रोक्का बैंक खाता फुकुवा गर्न अन्तरिम आदेश जारी गरेको छ।
गत चैत १५ गते तीनकुनेमा भएको राजावादी आन्दोलनपछि आन्दोलनका कमाण्डर तोकिएका प्रसाईँमाथि प्रहार भएपछि उनको व्यक्तिगत खातासहित अस्पतालका खाता पनि रोक्का गरिएको थियो। सोही निर्णयविरुद्ध डा. अञ्जली कार्कीले वि एण्ड सी मेडिकल कलेज टिचिङ हस्पिटल एण्ड रिसर्च सेन्टर प्रालि र र्वाञ्चल क्यान्सर हस्पिटल प्रालिको तर्फबाट छुट्टाछुट्टै रिट दायर गरेकी थिइन्।
सो रिटमाथि न्यायाधीश हरिप्रसाद फुयालको एकल इजलासले सुनुवाइ गर्दै दुवै खाता फुकुवा गर्न अन्तरिम आदेश दिएको हो। साथै, सर्वोच्चले खाता रोक्का गर्ने निर्णयमा संलग्न नेपाल प्रहरी, केन्द्रीय अनुसन्धान ब्युरो (CIB) लाजिम्पाटसहित १८ र १४ जना विपक्षीको नाममा कारण देखाउ आदेशसमेत जारी गरेको छ।
तीनकुने घटनाका क्रममा एक पत्रकार र एक सर्वसाधारणको ज्यान गएको थियो। साथै सरकारी गाडीसहित निजी घरहरूमा आगजनी र तोडफोड भएको थियो। नेकपा (एकीकृत समाजवादी)को कार्यालय तथा जडीबुटी उत्पादन तथा प्रशोधन केन्द्रमा समेत क्षति पुर्याइएको थियो। ती घटनापछि फरार रहेका प्रसाईँको खाता समेत रोक्का गरिएको थियो।
