अर्घाखाँची – अर्घाखाँची जिल्ला सन्धिखर्क नगरपालिकाभित्र व्यवसाय सञ्चालन गरिरहेका सामान्य व्यवसायीहरूले फोहोर व्यवस्थापन शुल्क अत्यधिक भएको गुनासो गरेका छन्।
उनीहरूले महिनामा २५० रुपैयाँ फोहोरको शुल्क तिर्नुपर्ने बाध्यता रहेको जनाएका छन्।
तर, त्यही घरमा पानीको बिल मात्र १५० रुपैयाँ आउने हुँदा फोहोर शुल्क पानीभन्दा बढी लिने व्यवस्था अन्यायपूर्ण र अव्यावहारिक भएको उनीहरूको भनाइ छ।
व्यवसायीहरूले फोहोर व्यवस्थापन महत्त्वपूर्ण विषय भए पनि शुल्क निर्धारण गर्दा व्यवसायको स्वरूप, परिमाण र आम नागरिकको आर्थिक अवस्थालाई ध्यानमा राखिनुपर्ने माग गरेका छन्।
सामान्य व्यवसायीहरूको भनाइमा, नगरपालिकाले पानीभन्दा बढी दरमा फोहोर शुल्क लिँदा यो निर्णय अन्यायपूर्ण र पुनर्विचारयोग्य छ।
उनीहरूले सम्बन्धित निकायलाई फोहोर व्यवस्थापन शुल्कमा न्यायसंगत दर कायम गर्न आग्रह गरेका छन्।
