काठमाडौं । भारतको राजधानी दिल्लीमा २० रुपैयाँको विवादका कारण एक नेपाली मोमो व्यवसायीमाथि तीन नाबालकले छुरा प्रहार गरेका छन्।
घाइते हुनेमा मूलतः नेपालका २८ वर्षीय तुलबहादुर रहेका छन्। उनी खोडा कलोनीमा बस्दै आएका थिए र पूर्वी दिल्लीको गाजीपुर क्षेत्रअन्तर्गत राजवीर कलोनीमा मोमो स्टल सञ्चालन गर्दै आएका थिए।
भारतीय सञ्चारमाध्यम एनडिटिभीका अनुसार ती तीन नाबालकले मोमो खाएपछि मूल्य तिर्न अस्वीकार गरेपछि विवाद चर्किएको थियो। विवादकै क्रममा उनीहरूले तुलबहादुरमाथि छातीमा छुरा प्रहार गरेका हुन्।
घाइते तुलबहादुरलाई तत्काल स्थानीयले लालबहादुर शास्त्री अस्पताल पुर्याएका थिए। अवस्था गम्भीर देखिएपछि उनलाई थप उपचारका लागि ट्रमा सेन्टर पठाइएको हो। हाल उनको अवस्था स्थिर रहेको बताइएको छ।
घटनापछि गाजीपुर प्रहरीको टोलीले ती तीनै नाबालकलाई नियन्त्रणमा लिएको छ र उनीहरूमाथि थप अनुसन्धान भइरहेको प्रहरीले जनाएको छ।
यस घटनाले साना विवादले समेत कस्तो खतरनाक रूप लिन सक्ने देखाएको छ। विशेष गरी सडक छेउका व्यवसायीहरू, जसले साना कामकाज गरेर जीविकोपार्जन गरिरहेका छन्, उनीहरू निरन्तर असुरक्षाको जोखिममा रहिरेको हुन्छ।
स्रोत : एनडिटिभी
