पर्वत — पर्वत जिल्लाको मोदी गाउँपालिका–३ देउराली लाङ्दिमा भीषण पहिरोले एक घर पुर्दा दुई जना बेपत्ता भएका छन् । अबिरल वर्षासँगै गएको पहिरोले छविलाल विकको घर पुरिँदा घरधनी छविलाल विक र उनकी श्रीमती बेपत्ता भएका हुन् ।
घटनाबेला घरमा रहेका विक दम्पति पहिरोमा पुरिएको स्थानीयले जनाएका छन् । उनीहरूका बुहारी भने सकुशल उद्दार गरिएको वडाध्यक्ष देवेन्द्र बहादुर क्षेत्रीले जानकारी दिनुभयो ।
“गएको रातिदेखिको लगातारको झरीपछि घरमाथिबाट पहिरो खसेर विकको घर पुरिएको हो,” अध्यक्ष क्षेत्रीले भन्नुभयो, “घटनास्थलमा स्थानीयको सहयोगमा उद्दार कार्य जारी छ ।”
स्थानीयवासी, जनप्रतिनिधि र सुरक्षाकर्मीहरू मिलेर उद्दार कार्य तीव्र पारिएको जनाइएको छ । बेपत्ताहरूको खोजी कार्यमा कठिनाइ भइरहेको छ भने थप जोखिम रोक्न सावधानी अपनाइएको वडाध्यक्ष क्षेत्रीले बताए।
वर्षायामसँगै पहिरोको जोखिम बढ्दै गएको भन्दै स्थानीय प्रशासनले सतर्कता अपनाउन आग्रह गरेको छ।
