- मुगुका स्वास्थ्य शाखा प्रमुख बलि बहादुर बुढाले सुर्खेतको वृद्धाश्रममा पुगी वृद्धवृद्धाहरूको स्वास्थ्य जाँच र फलफूल वितरण गर्नुभएको छ।
- उहाँले विगत लामो समयदेखि असहायहरूको उद्धार, आश्रय र आर्थिक सहयोग गर्दै उदाहरणीय मानवीय सेवा प्रदान गरिरहनुभएको छ।
- बाल्यकालको कष्टपूर्ण जीवनबाट प्रेरित भई अरूलाई दुःखबाट बचाउने पवित्र उद्देश्यले उहाँ सेवा कार्यमा समर्पित हुनुहुन्छ।
रतन बहादुर रावल मुगु- ७कात्तिक -विगत लामो समयदेखि ग्रामीण भेगका असहाय र सहाराविहीन नागरिकहरूको सहारा बन्दै आउनुभएका स्वास्थ्य शाखा प्रमुख बलि बहादुर बुढाले यसपटक मुगुबाट सुर्खेतको वृद्धाश्रममा पुगेर उदाहरणीय मानवीय सेवा प्रदान गर्नुभएको छ। उहाँले आश्रममा रहेका वृद्धवृद्धाहरूको स्वास्थ्य जाँच गरी आवश्यक परामर्श दिनुका साथै फलफूल समेत वितरण गर्नुभएको हो।गाउँवस्तीमा अलपत्र परेका बेसहाराहरूको खोजी गरी वृद्धाश्रमसम्म पुर्याउने र उनीहरूको आश्रयको प्रबन्ध मिलाउने कार्यमा बुढाले महत्वपूर्ण योगदान पुर्याउँदै आउनुभएको छ। स्वास्थ्य सेवा प्रवाहका साथै उहाँले समाजमा आइपर्ने विभिन्न भैपरि आउने दुःखद परिस्थिति र आर्थिक संकटमा परेका विपन्न नागरिकहरूलाई निरन्तर व्यक्तिगत रूपमा आर्थिक सहयोग समेत उपलब्ध गराउँदै आउनुभएको छ।
बाल्यकालको संघर्ष नै सेवाको प्रेरणा
आफ्नो बाल्यकालमा निकै दुःख, कष्ट र संघर्षपूर्ण जीवन बिताउनुभएका बुढाले पारिवारिक साहारा गुमेपछि फुपूको घरमा बसेर निकै कष्टका साथ एसएलसी (SLC) उत्तीर्ण गर्नुभएको थियो। आफ्नो विगतको त्यही संघर्ष र भोगाइ नै आज उहाँको सेवाभावको मुख्य प्रेरणा बनेको छ।
आफ्नो विगत सम्झिँदै स्वास्थ्य शाखा प्रमुख बुढाले भन्नुभयो, “मैले बाल्यकालमा जुन दुःख, पीडा र कष्ट भोगेँ, भोलिका दिनमा अरू कसैले र भविष्यका सन्ततिले त्यस्तो दुःख पाउनु नपरोस् भन्ने पवित्र उद्देश्यले नै म यो सेवा अभियानमा निरन्तर लागिरहेको छु।”
आफ्नो व्यक्तिगत सुख, सुविधा र स्वार्थभन्दा माथि उठेर असहायको सेवा र परोपकारमा समर्पित बुढाको यो उदाहरणीय मानवीय कार्यको स्थानीय नागरिक, बुद्धिजीवी तथा वृद्धाश्रम परिवारले उच्च प्रशंसा गरेका छन्।
