- अमेरिकी राष्ट्रपति ट्रम्पले उत्तरी आयरल्याण्ड र आयरल्याण्ड एकीकरण भएको हेर्ने इच्छा व्यक्त गरेका छन्।
- ट्रम्पको यो भनाइप्रति उत्तरी आयरल्याण्डका बेलायत समर्थक नेताहरूले तीव्र असन्तुष्टि जनाएका छन्।
- बेलायत सरकारले भने उत्तरी आयरल्याण्डलाई अलग गर्ने विषय तत्काल अगाडि नबढाउने अडान कायमै राखेको छ।
अमेरिकी राष्ट्रपति डोनाल्ड ट्रम्पले बेलायतअन्तर्गत रहेको उत्तरी आयरल्याण्डलाई आयरल्याण्डसँग एकीकरण भएको हेर्न आफू इच्छुक रहेको बताएका छन्। आयरल्याण्डको राजधानी डब्लिन भ्रमणका क्रममा ट्रम्पले यस्तो धारणा सार्वजनिक गरेका हुन्।
ट्रम्पको यस भनाइप्रति उत्तरी आयरल्याण्डका बेलायत समर्थक युनियनवादी नेताहरूले तीव्र असन्तुष्टि जनाएका छन्।
बेलायती प्रधानमन्त्री एन्डी बर्नह्यामले केही साताअघि उत्तरी आयरल्याण्डलाई संयुक्त अधिराज्यबाट अलग गर्ने विषयमा जनमतसंग्रहको सम्भावना तत्कालका लागि ‘टेबल बाहिर’ रहेको बताएका थिए। शनिबार डाउनिङ स्ट्रिटले पनि सरकारको उक्त धारणा कायमै रहेको स्पष्ट पारेको छ।
आयरल्यान्डका प्रधानमन्त्री माइकल मार्टिनसँग भेटवार्तापछि पत्रकारहरूसँग कुरा गर्दै ट्रम्पले भने, ‘ठीक छ, म कुनै समस्या निम्त्याउन चाहन्नँ, तर म तपाईंलाई भन्छु, म यसलाई एकताबद्ध भएको हेर्न चाहन्छु।’
उनले आयरल्याण्डको एकीकरण अन्ततः हुने विश्वास व्यक्त गर्दै भने, ‘मलाई लाग्छ, यो एक शानदार कुरा हुनेछ।’ बेलायतले यस विषयमा आफ्नो धारणा राख्नुपर्ने भए पनि आफूलाई आयरल्याण्ड एकीकृत भएको देख्न मन पर्ने ट्रम्पले बताए।
