- इन्डोनेसियाको अनाक क्राकाटाउमा ज्वालामुखी विस्फोट भएको छ।
- विस्फोटका कारण जकार्ता विमानस्थलको उडान केही समय रोकिएका छन्।
- हालसम्म मानवीय क्षति भएको विवरण आएको छैन र सुरक्षित रहन आग्रह गरिएको छ।
इन्डोनेसियाको अनाक क्राकाटाउमा ज्वालामुखी विस्फोटपछि राजधानी जकार्तामा रहेको अन्तर्राष्ट्रिय विमानस्थलमा आज बिहान केही समय सबै उडान स्थगित गरिएको छ ।
इन्डोनेसियाको भूगर्भीय निकायका अनुसार हिजोदेखि गतिविधि बढेको अनाक क्राकाटाउ आज बिहान ३ बजेर ५३ मिनेटमा झण्डै ३० सेकेन्डसम्म विस्फोट भएको थियो । विस्फोटपछि निस्किएको ज्वालामुखीको खरानी पश्चिमी इन्डोनेसियाका विभिन्न क्षेत्रमा फैलिएको छ ।
विमानस्थल प्रशासनले स्थानीय समयअनुसार विहान साढे ५ बजेदेखि साढे ९ बजेसम्म उडान सञ्चालन अस्थायी रूपमा रोकिएको जनाएको छ । जकार्ता, बान्तेन, पश्चिम जाभा, लाम्पुङ र बेङ्कुलु प्रान्तका केही क्षेत्र तथा सुमात्राको पश्चिमतर्फको हिन्द महासागर ज्वालामुखीको गतिविधि फैलिएको छ ।
तर मानवीय क्षतिबारेको विवरण आएको छैन । स्थानीय बासिन्दा तथा पर्यटकलाई ज्वालामुखीको सक्रिय मुख क्षेत्रबाट कम्तीमा ३ किलोमिटर टाढा रहन त्यहाँका अधिकारीले आग्रह गरेका छन् ।
