- भोटेकोशीको बाढीले बगाएको फुर्केखोला पुल तत्काल सञ्चालनमा ल्याउन कठिन देखिएको छ।
- उपलब्ध बेलिब्रिजले नदीको दूरी पार गर्न नसक्ने भएकाले नयाँ विकल्पको खोजी भइरहेको छ।
- हाल प्रभावित क्षेत्रमा वैकल्पिक सडक मार्गको प्रयोग गरी यातायात सञ्चालन गरिएको छ।
काठमाडौ -रसुवाकाे भाेटेकाेशी नदीमा आएकाे बाढीले बगाएको काठमाण्डौ–धादिङबेँसी जोड्ने फुर्केखोला पुललाई तत्काल सञ्चालमा ल्याउन कठिन देखिएको छ ।
फुर्केखोलमा तत्काल बेलिब्रिज राख्न सक्ने अवस्था नदेखिएको सडक विभागका महानिर्देशक डा. विजय जैसीले जानकारी दिनुभयो । उहाँका अनुसार बाढीले ११८ मिटर लामो स्टिल प्लेट गर्डर पुलसँगै एउटा पियरसमेत बगाएको छ ।
पुलको स्थलगत अनुगमन गर्दै महानिर्देशक जैसीले उपलब्ध बेलिब्रिजले नदीकाे दूरी पार गर्न नसक्ने बताउनुभयाे ।
यद्यपि पुल सञ्चालनका लागि विभिन्न वैकल्पिक उपायका बारेमा अध्ययन गरिरहेको सडक विभागले जनाएको छ । विभागले पुलको विस्तृत मापन गर्न प्राविधिक टोली खटाउने महानिर्देशक जैशीले बताउनुभयो ।
प्राविधिक अध्ययनपछि मात्रै पुल कसरी र कति समयमा सञ्चालनमा ल्याउन सकिन्छ भन्ने टुङ्गो लाग्नेछ ।
बाढीले पुल बगाएपछि प्रभावित क्षेत्रमा वैकल्पिक मार्गबाट यातायात सञ्चालन भएको छ । जैसीका अनुसार मासटारतर्फको पुल सुरक्षित रहेकाले फुर्केखोलाबाट मासटारसम्मको सडकलाई वैकल्पिक मार्गका रूपमा प्रयोग गरिएको छ ।
