- इरानबाट हुन सक्ने सम्भावित आक्रमणको डरले ट्रम्पले टर्किएमा गोप्य रूपमा विमान परिवर्तन गर्नुभएको थियो।
- सुरक्षा अधिकारीहरूको सल्लाहबमोजिम उहाँ ट्रकमा लुकेर अर्को विमानमा चढ्नुभएको हो।
- यस घटनाबारे उहाँका साथमा रहेका पत्रकार र कर्मचारीलाई समेत केही जानकारी थिएन।
अमेरिकी राष्ट्रपति डोनाल्ड ट्रम्पले गएको महिना टर्किएमा इरानको डरका कारण आफूले ट्रकमा लुकेर विमान बदलेको बताउनुभएको छ ।
पत्रकारसँगको कुराकानीमा उहाँले नेटो शिखर सम्मेलनमा भाग लिएर अङ्काराबाट फर्कँदा प्रयोग गर्न लागेको विमानमाथि आक्रमणको खतरा रहेको कारण गोप्य रूपमा ट्रकमा लुकेर अर्को विमानमा चढेको बताउनुभएको बीबीसीले जनाएको छ ।
ट्रम्पले पत्रकारसँग भन्नुभयो, ‘म सिक्रेट सर्भिस र सेनाको सल्लाहअनुसार चल्छु । उनीहरूले म अर्कै उडान र अर्कै विमानमा जाऊँ भन्ने चाहेका थिए । उनीहरूले जे भन्छन् मैले त्यही पालना गर्नुपर्छ ।’
यसअघि वाशिङ्टन पोस्टले ट्रम्पले सुटुक्क विमान फेरेको र त्यस क्रममा उहाँ केहीबेर एउटा ट्रकमा लुकेको विवरण प्रकाशित गरेको थियो ।
अमेरिकी राष्ट्रपतिले प्रयोग गर्ने ’एअर फोर्स वन’ मा रहेका पत्रकार र ह्वाइट हाउसका कर्मचारीलाई ट्रम्प अर्को विमानमा गइसकेको कुरा थाहा थिएन ।
सीबीएस न्यूजका अनुसार त्यसबेला ट्रम्पलाई निशाना बनाउँदै इरानबाट क्षेप्यास्त्र प्रहार हुन सक्ने विश्वसनीय सूचना थियो ।
अमेरिका र इरानबीच युद्ध अन्त्य गर्ने वार्ता भङ्ग भएपछि अमेरिकाले इरानमाथि पुनः सैन्य आक्रमण शुरू गरेको भोलिपल्ट ट्रम्प अङ्काराबाट फर्कनुभएको थियो ।
