गायिका ज्योति मगरको टिप्पणी : आज देशमा जे भइ रहेको छ, “यो क्रान्ति होइन, अराजकता र भाँडभैलो हो”

लुम्बिनी – लोकप्रिय गायिका ज्योति मगरले पछिल्लो समय देशभर भइरहेका राजनीतिक गतिविधि र जेन–जी आन्दोलनपछिका घटनाहरूलाई लिएर कडा प्रतिक्रिया व्यक्त गरेकी छन्। उनले सामाजिक सञ्जालमा स्टाटस लेख्दै अहिलेको परिस्थितिलाई ‘क्रान्ति होइन, अराजकता र भाँडभैलो’ भनेर व्याख्या गरेकी छन्।

ज्योतिले लेखेकी छन्,  “आज जे भइरहेको छ, यो क्रान्ति होइन, अराजकता र भाँडभैलो हो।”

उनका अनुसार, नेपालमा भएका सबै राजनीतिक परिवर्तनहरू नेपाली जनताको हक, अधिकार र हितका लागि भएका हुन्। तर, ती परिवर्तनपछि पनि नेताहरूले जनताको वास्तविक अपेक्षा पूरा गर्न नसकेको उनको गुनासो छ।

जेन–जी आन्दोलनपछिको अवस्थालाई टिप्पणी गर्दै उनले व्यङ्ग्यात्मक शैलीमा लेखेकी छन्,

“केटाकेटी आए गुलेली खेलाए, मट्यांग्राको नास।”अन्त्यमा उनले लेखेकी छन्, “ल, अब गाली बर्साउनुस् — देशको झण्डा ओढेर देश जलाउने सच्चा देशभक्तहरू।”

सामाजिक सञ्जालमा सक्रिय कलाकार ज्योति मगर यसअघि पनि विभिन्न सामाजिक र राजनीतिक विषयमा आफ्ना धारणा सार्वजनिक गर्दै आएकी छिन्।