काठमाडौं । हमासले गाजामा बन्धक बनाएकामध्ये २२ जना अझै जीवित रहेको विश्वास गरिएको छ, जसमा नेपाली विद्यार्थी विपिन जोशीको नाम पनि समावेश भएको नयाँ सूची सार्वजनिक भएको छ।
अमेरिकी पत्रिका वासिङ्टन पोस्टले सार्वजनिक गरेको जीवित बन्धकहरूको सूचीमा विपिनको नाम देखिएको हो। यसअघि सीएनएनले प्रकाशन गरेको रिपोर्टमा भने २० जना मात्र जीवित रहेको उल्लेख गरिएको थियो र नेपाली विद्यार्थी विपिन जोशीको अवस्था “अज्ञात” भनिएको थियो।
गाजामा युद्धविराम सम्झौता भइसकेको छ भने बन्धकहरू आज (आइतबार) वा भोलिसम्म रिहा हुने सम्भावना रहेको अमेरिकी राष्ट्रपति डोनाल्ड ट्रम्पले बताएका छन्।
सन् २०२३ अक्टोबर ७ मा हमासले इजरायलमा गरेको आक्रमणका क्रममा विपिन जोशी अपहरणमा परेका थिए। हाल बन्धक रिहा हुने खबरसँगै कञ्चनपुरको भीमदत्त नगरपालिका–३, भाँसीका महानन्द जोशीको परिवारमा विपिन फर्किने आशा पुनः जागेको छ।