काठमाडौं । प्रधानमन्त्री सुशीला कार्कीले नेपालको शासकीय प्रणाली परिवर्तन हालको सरकारको कार्यक्षेत्र भित्र नभएको स्पष्ट पारेकी छन् । उनले आवश्यक परेमा संविधान संशोधनको संवैधानिक प्रक्रियाबाट मात्र त्यसको समाधान खोज्न सकिने बताइन् ।
प्रत्यक्ष निर्वाचित कार्यकारीको प्रणाली कायम गर्नुपर्ने मागसहित जेनजी आन्दोलनकारीले दबाब दिइरहेका बेला प्रधानमन्त्री कार्कीले बिहीबार राष्ट्रका नाममा सम्बोधन गर्दै तत्काल त्यसलाई कार्यान्वयन गर्न नसकिने प्रस्ट्याइन् ।
‘शासकीय प्रणालीको संशोधन विषय वर्तमान सरकारको कार्यक्षेत्र भन्दा बाहिर भएकाले म संवैधानिक प्रक्रियाबाटै संविधान संशोधन गर्न आह्वान गर्दछु,’ प्रधानमन्त्री कार्कीले भनिन् ।
सम्बोधनका क्रममा उनले आफ्नो सरकारको प्राथमिकता निर्वाचनमा केन्द्रित हुने पनि दोहोराइन् ।
यता, जेनजी युवाहरूले प्रत्यक्ष निर्वाचित कार्यकारीको व्यवस्था नभए अर्को आन्दोलन गर्ने चेतावनी दिँदै आएका छन् ।
