काठमाडौं– नेपाली कांग्रेसका सभापति तथा पूर्वप्रधानमन्त्री शेरबहादुर देउवालाई जेनजी आन्दोलनका क्रममा भएको आक्रमणमा गम्भीर चोट लागेर १२ टाँका लगाइएको जनाइएको छ ।
कांग्रेस उपसभापति पूर्णबहादुर खड्काले शुक्रबार बसेको केन्द्रीय कार्यसम्पादन समिति बैठकमा देउवाको स्वास्थ्य अवस्थाबारे नेताहरूलाई जानकारी दिएका थिए। बैठकपछि प्रचार विभाग प्रमुख मीन विश्वकर्माले पत्रकार सम्मेलनमार्फत सभापति देउवाको स्वास्थ्यबारे विवरण सार्वजनिक गरेका थिए ।
उनका अनुसार, देउवाको गर्धनमा गम्भीर चोट लागेर १२ टाँका लगाउनुपरेको हो। हाल उनी सैनिक अस्पताल छाउनीमा उपचाररत छन्। विश्वकर्माका भनाइमा, “देउवाको स्वास्थ्य अवस्था सामान्य छ, क्रिटिकल छैन। उपचारमा रहेका छन् र सुधार हुँदै गएको छ।”
आक्रमणको घटनाक्रम गत भदौ २४ गते बुढानीलकण्ठस्थित देउवा निवासमा जेनजी आन्दोलनकारीहरुले आक्रमण गरेका थिए। उनीहरूले देउवा दम्पत्तिलाई घरबाहिर निकालेर कुटपिट गरेका थिए भने घरसमेत जलाएका थिए। त्यस क्रममा देउवालाई टाउको र गर्दनतर्फ गम्भीर चोट लागेको थियो।
