काठमाडौं, भदौ २३ – सरकारले ल्याउन खोजेको सामाजिक सञ्जाल नियन्त्रण नीति र बढ्दो भ्रष्टाचारविरुद्ध जेनजी (Gen Z) पुस्ताले आज देशैभर प्रदर्शन गरेका छन्। राजधानी काठमाडौंसहित देशका विभिन्न शहरहरूमा युवाहरू सडकमा उत्रिएर नारा लगाउँदै सरकारको नीति र गतिविधिको विरोध गरेका छन्।
युवाहरूले सरकारको मनोमानी, आर्थिक बेथिति र अभिव्यक्ति स्वतन्त्रतामाथि लगाउन खोजिएको नियन्त्रणप्रति आक्रोश पोख्दै सडक तताएका हुन्। बुटवल, पोखरा, विराटनगर, धनगढी लगायतका शहरहरूमा पनि युवाहरूले नाराबाजीसहित ¥याली निकालेर सरकारविरुद्ध आक्रोश व्यक्त गरेका छन्।
सामाजिक सञ्जालमै संगठित भएर सुरु भएको यो आन्दोलन दिन प्रतिदिन तीव्र बन्दै गएको छ। युवाहरूले चेतावनी दिंदै भनेका छन् – “भ्रष्टाचार अन्त्य गर, स्वतन्त्रता खोस्न खोजे हामी चुप लाग्दैनौं।”
आन्दोलन चर्किँदै गएपछि काठमाडौं जिल्लाको संवेदनशील बानेश्वर क्षेत्रलाई नियन्त्रणमा लिन जिल्ला प्रशासन कार्यालयले आज अपराह्न १२:३० बजेदेखि राति १० बजेसम्म कर्फ्यु आदेश जारी गरेको छ। कर्फ्यु अवधिभर तोकिएको क्षेत्रमा कुनै पनि सभा, जुलुस, बैठक तथा आवागमनमा प्रतिबन्ध रहने जनाइएको छ।
युवाहरूले भने आन्दोलन अझ व्यापक बनाउने तयारी गरिरहेका छन्। सडकमा देखिएको भीड र सामाजिक सञ्जालमा फैलिएको समर्थनले यो आन्दोलन लामो र प्रभावकारी बन्ने संकेत देखिएको छ
प्रमुख जिल्ला अधिकारी छविलाल रिजालले नेपाल खोजखबर लाई दिएको जानकारी अनुसार “शान्ति सुरक्षा कायम राख्नका लागि सो क्षेत्रमा कुनै पनि प्रकृतिको भेला, जुलुस, प्रदर्शन, सभा, बैठक तथा आवागमन नगर्न आग्रह गरिएको छ।”