काठमाडौं । प्रधानमन्त्री केपी शर्मा ओली पाँच दिने चीन भ्रमण सकेर बुधबार राति स्वदेश फर्किएका छन् । प्रधानमन्त्रीलाई त्रिभुवन अन्तर्राष्ट्रिय विमानस्थलमा उपप्रधान तथा शहरी विकासमन्त्री प्रकाशमान सिंह, परराष्ट्रमन्त्री आरजु राणा देउवा, गृहमन्त्री रमेश लेखकसहितका उच्च सरकारी अधिकारीहरूले स्वागत गरेका थिए ।
भ्रमणबारे जानकारी दिन परराष्ट्र सचिव अमृतबहादुर राईले पत्रकार सम्मेलन गरे । उनले चीन भ्रमणका क्रममा प्रधानमन्त्री ओलीले गरेका भेटवार्ता, छलफल र सहमतिबारे संक्षेपमा जानकारी गराउँदै अब सरकारले भारत भ्रमणको तयारी गर्ने बताएका छन् ।
‘अब भारतको तयारीमा लाग्छौं ?’ भन्ने सञ्चारकर्मीको प्रश्नमा सचिव राईले, “निश्चितै रुपमा” भन्ने जवाफ दिएका थिए । उनले नेपालले सधैं आफ्ना प्राथमिकता र अडानहरूको तयारी गरिरहने बताउँदै, “चीनमा जसरी आफ्ना कुराहरू प्रधानमन्त्री ओलीले राख्नुभयो, भारतमा पनि त्यसरी नै आफ्ना कुरा राख्नुहुन्छ,” भने ।
उनका अनुसार नेपाल सधैं आफ्नो परराष्ट्र नीतिको आधारभूत सिद्धान्तअनुसार अघि बढ्नेछ । भ्रमणका क्रममा चिनियाँ राष्ट्रपति सी चिनफिङले ‘एक चीन सिद्धान्त’ प्रति नेपालको अडानलाई स्वागत गर्दै प्रधानमन्त्री ओलीलाई धन्यवाद दिएको जानकारी पनि सचिव राईले दिएका छन् । प्रधानमन्त्री ओलि अब भारत भ्रमण गर्दै गर्दा के सिमा विवादको मुद्दा टुङ्गिन्छ या बढ्छ भने धेरैको गुनासो र प्रतीक्षा समेत रहेको पाइन्छ ।
