काठमाडौं, भदौ २२ । करिब ४५ वर्षअघि सिन्धुपाल्चोकमा कर्तव्यज्यान मुद्दामा संलग्न भई फरार रहेका एक अभियुक्तलाई प्रहरीले पक्राउ गरेको छ ।
प्रहरीको केन्द्रीय अनुसन्धान ब्यूरो (सीआईबी)को टोलीले सिन्धुपाल्चोक बलेफी गाउँपालिका–६ (साविक माङ्खा गाविस–८) निवासी ७० वर्षीय जिवनाथ तिमिल्सिनालाई काठमाडौं महानगरपालिका–१३, ताहाचलबाट पक्राउ गरेको हो ।
मिति २०३७ साल कार्तिक ७ गते तामाङ समुदायका जितबहादुर तामाङलाई आँखामा खुर्सानीको धुलो छर्की कुटपिट तथा खुकुरी प्रहार गरी हत्या गरेको आरोपमा तिमिल्सिना दोषी ठहर भएका थिए । उनलाई अदालतले २० वर्ष कैद सजाय सुनाएको थियो । तर उनी लामो समयदेखि फरार रहेका थिए ।
गोप्य सूचनाका आधारमा पक्राउ परेका तिमिल्सिनालाई सीआईबी टोलीले काठमाडौं जिल्ला अदालतमा पेश गरेको थियो । अदालतको आदेशअनुसार सजाय भुक्तानका लागि उनलाई डिल्लीबजार कारागार चलान गरिएको प्रहरीले जनाएको छ ।
यसबारे सीआईबीका सूचना अधिकारी युवराज खडकाले नेपाल खोजखबर लाई जानकारी दिएका हुन ।
