कर्णाली – अविरल वर्षापछि आएको भीषण ढुङ्गा सहितको पहिरोले चार दिनदेखि अवरुद्ध भएको कर्णाली राजमार्ग पुनः सञ्चालनमा आएको छ ।
भदौ १४ गते बिहान ९ बजेदेखि कालिकोटको गगने खोलामा ठूलो पहिरो खसेपछि सडक अवरुद्ध भएको थियो । मंगलबार दिउँसो १२ः४० बजेदेखि राजमार्ग सञ्चालनमा आएपछि सडकमा चार दिनदेखि रोकिएका स्याउ बोकेका ट्रक सुर्खेत–नेपालगञ्जतर्फ गएका छन् ।
राजमार्ग बन्द हुँदा २३ वटा ट्रक सडकमै अलपत्र परेका थिए । ती ट्रकमा झण्डै १३ करोड रुपैयाँ बराबरका १८४ मेट्रिकटन स्याउ लोड गरिएको थियो । लामो समय सडकमै रोकिँदा स्याउ कुहिने खतरा व्यापारीमा बढेको थियो ।
ढुङ्गा फोड्न ब्रेकर प्रयोग गर्दा नफुटेपछि अन्ततः नेपाली सेनाले ब्लाष्ट गरेर सडक खुलाइएको हो । तर सोमबार पनि चार पटकसम्मको ब्लाष्ट असफल भएपछि वर्षातका कारण लेदो पहिरो थप खस्न सक्ने जोखिम देखिएकोले काम रोकिएको थियो ।
सडक डिभिजन जुम्लाका प्रमुख दिपेन्द्र चौधरीका अनुसार कालिकोट प्रहरीले प्रशासन र नेपाली सेनासहित सबै जनशक्ति परिचालन गरेर सडक सुचारु गरिएको हो । उहाँले मौसम प्रतिकूलता, भौगोलिक कठिनाइ र स्रोत–साधनको अभावका कारण सडक चाँडै खुलाउन नसकिएको बताउनुभयो ।
स्याउका गाडीहरू गन्तव्यतर्फ लागेपछि किसान र व्यापारी खुसी भएका छन् । उनीहरूले हरेक वर्ष स्याउ सिजनमै राजमार्ग अवरुद्ध हुने समस्या देखिने भएकाले दीर्घकालीन समाधान र ढुवानीमा सहुलियत दिन सरकारसँग माग गरेका छन् ।
सडक डिभिजन जुम्लाले अझै वर्षा जारी रहेकाले कर्णाली राजमार्गमा पहिरोको जोखिम कायम रहेको जनाउँदै अत्यावश्यक कामबाहेक यात्रामा नजान सर्वसाधारणलाई आग्रह गरेको छ ।
