दार्चुला । दार्चुलाको नौगाड गाउँपालिका–५ शौकेबगरमा अटोरिक्सा दुर्घटना हुँदा एक बालिकाको मृत्यु भएको छ भने दुईजना बेपत्ता भएका छन् ।
नौगाड खोलामा खसेको अटोरिक्सामा सवार ११ वर्षीया अरुणा धामीको घटनास्थलमै मृत्यु भएको जिल्ला प्रहरी कार्यालय दार्चुलाका प्रहरी निरीक्षक एवम् सूचना अधिकारी छत्रबहादुर रावतले जानकारी दिनुभयो । उनका अनुसार अटोरिक्सामा पाँचजना सवार रहेका थिए ।
होपरीगाडबाट धुलिगडातर्फ जाँदै गरेको म १ ह ११४८ नम्बरको अटोरिक्सा शनिबार दिउँसो दुर्घटनाग्रस्त भएको हो । दुर्घटनापछि दुईजना बेपत्ता भएका छन् भने चालक मनिराम भुललाई प्रहरीले नियन्त्रणमा लिएको छ ।
सो अटोरिक्सामा रहेका चालकका १७ वर्षीय छोरा आयुस भुल घाइते भएका छन् । उनको गोकुलेश्वर अस्पतालमा उपचार भइरहेको प्रहरीले जनाएको छ ।
बेपत्ता भएकाको पहिचान खुलेको छैन । उनीहरूको खोजीका लागि धुलिगडा र होपरीगाडबाट प्रहरी टोली घटनास्थलमा खटिएको प्रहरीले जनाएको छ ।
