काठमाडौं । रुपन्देही प्रहरीले दुई दिनको अवधीमा विभिन्न ठाउँमा चेकजाँच गर्दा झण्डै पाँच लाख बराबरको अबैध सामान नियन्त्रणमा लिएको छ । जिल्ला प्रहरी कार्यालय रुपन्देही र मातहतका प्रहरी टोलीले भदौ १४ र १५ गते सञ्चालन गरेको विशेष चेकजाँचमा भन्सार छली गरी ल्याइएका मोटरसाइकल, घरेलु उपभोग्य वस्तु, कुखुरा, बाख्रा लगायतका सामान बरामद भएका हुन् ।
प्रहरीका अनुसार रुपन्देहीको रोहिणी गाउँपालिका वडा नं. २, ३ र ७ तथा ओमसतिया गाउँपालिका वडा नं. ३ बाट दुईवटा मोटरसाइकल (लु ४ प ७१८ र लु ४ प ८५७३), १९ वटा बोइलर कुखुरा, १५ किलो सेमइ, ८० बोतल स्प्राईट, पाउडर दूध, कमला पसंद, दुई वटा बाख्रा, ९० किलो मटर, तीन बोरा चिनी लगायत सामानसहित करिब रु. १ लाख ७२ हजार बराबरको मालसामान बरामद गरिएको छ । सो क्रममा रोहिणी गाउँपालिका–७ बस्ने ४० वर्षीय गुलाम मुराउ र २२ वर्षीय मुक्टार अली मुसलमानलाई पक्राउ गरी आवश्यक कारबाहीका लागि भन्सार कार्यालय बेलहिया पठाइएको प्रहरीले जनाएको छ ।
यस्तै, रोहिणी गाउँपालिका वडा नं. २ र ७ बाटै संयुक्त प्रहरी टोलीले मोटरसाइकलसहित १९ वटा कुखुरा, तीन पेटी पेय पदार्थ, दुई बोरा किराना सामान बरामद गरेको छ । बरामद गरिएको सामानको मूल्य करिब रु. १ लाख ९० हजार रहेको बताइएको छ ।
त्यसैगरी, इलाका प्रहरी कार्यालय लुम्बिनीबाट खटिएको टोलीले लुम्बिनी साँस्कृतिक नगरपालिका वडा नं. १० महिलवारबाट भारतीय नम्बर प्लेटका दुई मोटरसाइकल (UP 55 N7406 र MH 48 AD 5621), ७२ पिस बोइलर कुखुरासहित रु. १ लाख १५ हजार बराबरको मालसामान नियन्त्रणमा लिएको छ । यस प्रकरणमा लुम्बिनी साँस्कृतिक नगरपालिका–१३ वडवलिया बस्ने २४ वर्षीय प्रदिप राजपुत र वडा नं. १२ सुक्रौली बस्ने २० वर्षीय लालु यादवलाई नियन्त्रणमा लिइ भन्सार कार्यालय बेलहिया पठाइएको प्रहरीले जनाएको छ ।
कुल मूल्य रु. ४ लाख ७७ हजारभन्दा बढीको अबैध सामान बरामद भएको प्रहरीको भनाइ छ । बरामद सामानलाई आवश्यक कारबाहीका लागि भन्सार तथा पशु क्वारेन्टाइन कार्यालय बेलहिया बुझाइएको जनाएको छ ।
