काठमाडौँ । प्रमुख प्रतिपक्षी दल नेकपा (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ आज साँझ राष्ट्रिय स्वतन्त्र पार्टी (रास्वपा) का सभापति रवि लामिछानेलाई भेट्न नक्खु कारागार जान लागेका छन्।
प्रचण्ड आज साँझ ६ बजे पूर्व उपप्रधान तथा गृहमन्त्री समेत रहेका लामिछानेलाई भेट्न जाने कार्यक्रम रहेको उनको सचिवालयले जनाएको छ। सहकारी ठगी मुद्दामा थुनामा रहेका लामिछानेलाई केही दिनअघि मात्र रुपन्देही जिल्ला कारागारबाट नक्खु कारागार स्थानान्तरण गरिएको हो।
स्थानान्तरण भएको भोलिपल्टै लामिछानेको स्वास्थ्यमा समस्या देखिएको र चिकित्सकको निगरानीमा राखिएको जानकारी सार्वजनिक भएको थियो।
यसअघि विभिन्न दलका शीर्ष नेताहरू पनि लामिछानेलाई भेट्न कारागार पुगेका थिए। प्रचण्डको आजको भेटलाई राजनीतिक वृत्तमा विशेष चासोका साथ हेरिएको छ।
