काठमाडौं – भारतलाई हराउँदै म्याट्रिक्स फाइट नाइट (एमएफएन) १७ मा बान्टमवेट च्याम्पियन बन्न सफल नेपाली खेलाडी रवीन्द्र ढाँटलाई सरकारले ५ लाख रुपैयाँ पुरस्कार दिने भएको छ। हालै बसेको मन्त्रिपरिषद् बैठकले रवीन्द्रको उत्कृष्ट प्रदर्शनको कदर गर्दै प्रोत्साहनस्वरूप उक्त रकम उपलब्ध गराउने निर्णय गरेको हो।
सरकारको निर्णयअनुसार रवीन्द्रका प्रशिक्षकलाई पनि २ लाख रुपैयाँ पुरस्कार दिइनेछ। यो उपाधि जितेर रवीन्द्रले पहिलोपटक नेपाललाई एमएफएनको बान्टमवेट च्याम्पियनको ताज दिलाएका हुन्।
यसअघि, काठमाडौं महानगरपालिकाले पनि रवीन्द्रलाई सम्मानसहित २ लाख रुपैयाँ प्रदान गरिसकेको छ। रवीन्द्रको ऐतिहासिक जितप्रति कृतज्ञता व्यक्त गर्दै विभिन्न संघ–संस्थाहरूले समेत बधाई तथा सम्मान कार्यक्रमको तयारी गरिरहेका छन्।
रवीन्द्रले गत महिनाको फाइनलमा भारतीय प्रतिस्पर्धीलाई पराजित गर्दै उपाधि आफ्नो पक्षमा पारेका थिए। यो जित नेपाली एमएमए (मिक्स्ड मार्सल आर्ट्स) क्षेत्रमा एक महत्वपूर्ण माइलस्टोनका रूपमा लिइएको छ ।
