प्युठान, असार ३१ – प्युठानको सरुमारानी गाउँपालिका–३ गोठेरीकी २८ वर्षीया रुक्मनी बरालको आफ्नै पूर्वपति लिलबहादुर बरालद्वारा चक्कु प्रहार गरी हत्या गरिएको छ। लिलबहादुर ऐरावती गाउँपालिका–२ कात्तिकेका ३० वर्षीय हुन्।
जिल्ला प्रहरी कार्यालय प्युठानका प्रमुख, प्रहरी नायब उपरीक्षक (डीएसपी) दीपेश बस्यालका अनुसार घटना आज बिहान १० बजेतिर भएको हो। प्रहरीले लिलबहादुरलाई घटनास्थलबाटै नियन्त्रणमा लिएको छ।
प्रहरीमा दिएको बयान अनुसार लिलबहादुर हालै मात्र वैदेशिक रोजगारीबाट फर्किएका थिए। उनी इजरायलमा श्रमिकको रूपमा कार्यरत थिए र असार २४ गते नेपाल फर्किएका थिए। विदेशमा रहँदा श्रीमतीले परपुरुषसँग विवाह गरेको थाहा पाएपछि उनले पटक–पटक रुक्मनीलाई पुनः घर फर्कन आग्रह गरेका थिए। तर रुक्मनीले अस्वीकार गरेपछि आक्रोशमा आएर उनले हत्या गरेको प्रहरी सामु स्वीकार गरेका छ्न ।
प्रहरी अनुसन्धान अनुसार रुक्मनीले वैदेशिक रोजगारीमा रहेका बेला लिलबहादुरसँग सम्बन्धविच्छेद गरी गत वैशाखमा दीपक परियारसँग दोस्रो विवाह गरेकी थिइन्। उनका नयाँ पति दीपक करिब १५ दिनअघि कामको सिलसिलामा संखुवासभा गएका थिए। त्यसपछि रुक्मनी आफ्नी जेठानी डिला परियारको घरमा बस्दै आएकी थिइन्।
डिला परियारका अनुसार लिलबहादुरले आज बिहान रुक्मनीलाई फोन गरी भेट्न बोलाए र घरभित्र पुग्नेबित्तिकै चक्कु प्रहार गरी हत्या गरेको प्रहरीले जनाएको छ ।
रुक्मनी र लिलबहादुरको वैवाहिक सम्बन्धबाट ६ वर्षको छोरा र साढे तीन वर्षकी छोरी छन्। आमाको हत्या र बाबु प्रहरी हिरासतमा परेपछि दुवै बालबालिका बिचल्लीमा परेका छन्। घटनाको थप अनुसन्धान भइरहेको जिल्ला प्रहरी कार्यालय प्युठानले जनाएको छ।
