काठमाडौं, असार १२ –नेपाल सुनचाँदी व्यवसायी महासंघ र नेपाल सुनचाँदी रत्न तथा आभूषण महासंघले नेपाल सरकारद्वारा लागू गरिएको अव्यवहारिक कर नीतिविरुद्ध अनिश्चितकालीन व्यापार बन्दको घोषणा गरेका छन्।
संयुक्त महासंघद्वारा जारी गरिएको विज्ञप्तिमा उल्लेख गरिए अनुसार, जिल्लास्तर, नगरस्तर तथा अन्य आम व्यवसायीहरूबाट प्राप्त लिखित र मौखिक सुझावको आधारमा २०८२ साल असार १३ गतेदेखि सम्पूर्ण जिल्ला, नगर, वस्तुगत तथा एसोसिएट सदस्य व्यवसायीहरूले व्यापार बन्द गर्ने निर्णय गरिएको छ।
महासंघले सबै सम्बन्धित व्यवसायीहरूलाई सो निर्णयको जानकारी आफ्ना सदस्यहरूमा पुर्याई व्यापार बन्दमा सहभागी गराउन अनुरोध गरेको छ। साथै, महासंघद्वारा थप आन्दोलनका कार्यक्रमहरू पनि तय गरिने जनाइएको छ।
संयुक्त विज्ञप्तिमा महासंघका महासचिव नीर बहादुर विश्वकर्मा र किरणप्रसाद बज्राचार्यले हस्ताक्षर गरेका छन्।
विज्ञप्ति अनुसार, सरकारको कर नीति तत्काल फिर्ता नलिइए थप संघर्षका कार्यक्रम घोषणा गरिने चेतावनी समेत दिइएको छ।
