काठमाडौं — प्रधानमन्त्री तथा नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले वर्तमान निर्वाचन प्रणालीलाई सुधार नगरेसम्म लोकतन्त्रमा जनताको वास्तविक सहभागिता सुनिश्चित हुन नसक्ने बताएका छन्।
एक सार्वजनिक कार्यक्रमलाई सम्बोधन गर्दै प्रचण्डले निर्वाचनको नाममा करोडौँ रुपैयाँ खर्च गर्नुपर्ने अहिलेको प्रणालीलाई ‘लुटेरा निर्वाचन प्रणाली’ को संज्ञा दिँदै त्यसको अविलम्ब पुनरावलोकन र सुधार आवश्यक रहेको बताए। उनले भने, “हामीले यस्तो निर्वाचन प्रणाली चाहेका होइनौं जहाँ पैसा र पहुँच भएका मानिस मात्र अगाडि आउँछन्। यो प्रणालीले आम जनताको प्रतिनिधित्व गर्न सक्दैन।”
प्रचण्डले जनताको पहुँचभन्दा बाहिर गएको निर्वाचन खर्चले भ्रष्टाचार, धनको दुरुपयोग र राजनीतिमा अपारदर्शिता बढाएको स्पष्ट पारे। उनका अनुसार अहिलेको प्रणालीले लोकतन्त्रलाई कमजोर बनाउँदै गएको छ र यसले गर्दा सच्चा नेता भन्दा धनाढ्य वर्ग मात्रै संसदमा पुग्ने खतरा बढेको छ।
उनले निर्वाचन सुधार आयोगमार्फत समावेशी, पारदर्शी र खर्च नियन्त्रणमा राखिने प्रणालीको खाका तयार गर्नुपर्नेमा जोड दिएका छन्। साथै, उनले पार्टीभित्र पनि आन्तरिक लोकतन्त्र सुदृढ गर्दै नयाँ पुस्तालाई नेतृत्वमा ल्याउने प्रतिबद्धता व्यक्त गरेका थिए ।
