म्याग्दी — म्याग्दीको अन्नपूर्ण हिमालमा हिउँपहिरोमा परी दुई जना शेर्पा गाइड बेपत्ता भएका छन्।
अन्नपूर्ण हिमालको क्याम्प २ र ३ को बीचमा आज बिहान हिउँपहिरो आउँदा सोलुखुम्बुका रिमा शेर्पा र निमा टासी शेर्पा सम्पर्कविहीन भएका हुन्। सेभेन समिट ट्रेकिङ एजेन्सीका सञ्चालक निङ्मा शेर्पाका अनुसार, आधार शिविरमा रहेका अन्य शेर्पाहरू उनीहरूको खोजीमा जुटेका छन्।
यसबीच, काठमाडौँबाट उद्धार टोली हेलिकप्टरमार्फत पठाइएको छ।
पर्यटन विभागका अनुसार वसन्त यामका लागि चार आरोहण समूहबाट ३० जना पुरुष र १२ जना महिलाले अन्नपूर्ण हिमाल आरोहणको अनुमति लिएका छन्।
हिउँपहिरोका कारण हिमाली क्षेत्रमा सधैं जोखिम रहने भन्दै स्थानीय प्रशासनले सतर्कता अपनाउन अनुरोध गरेको छ।