प्रदिप राज कुवार
दाङ – घोराही उपमहानगरपालिका-१० निवासी २६ वर्षीया शिला चौधरीमाथि घोराही-११ चागुका गोपाल चौधरीकी श्रीमती र स्थानीय केही महिलाहरुले मरणासन्न हुने गरी कुटपिट गरेका छन्।
कागजी मिलापत्र गरेर पठाएपछि अहिले महिला अधिकारकर्मीहरुको पहलमा प्रहरी कार्यालयमा उजूरी दर्ता गरिएको छ।
अधिकारकर्मी खुमा खड्काले महिलालाई अत्यन्तै तल्लोस्तरमा दुर्व्यवहार गरिएकाले न्याय दिनका लागि प्रहरी कार्यालयमा पहल गरिएको र हाल पीडकलाई कारबाहीको माग गर्दै अभद्र व्यवहारमा उजूरी दर्ता गरिएको जानकारी दिइन्।
पीडित शिलालाई गोपालले साँझ आफ्नो घरमा बोलाएको बेला उनकी श्रीमतीसमेत विभिन्न व्यक्तिहरुले घरभित्र कुटपिट गरी लछारपछार गरेका थिए। फेरि बाहिर बिजुलीको पोलमा ल्याइ डोरीले बाँधेर मरणासन्न हुने गरी कुटपिट गरेको भिडियोसमेत सार्वजनिक भएको छ।
जिल्ला प्रहरी कार्यालय दाङका डिएसपी चक्रबहादुर शाहका अनुसार घटना चैत ९ गते हाे। अनुसन्धानका लागि तीन जनालाई हिरासतमा राखिएकाे छ भने प्रहरीले कारण खुलाउन चाहेकाे छैन।
‘अनुसन्धान भइरहेको छ। सबै कारण खुलेपछि हामी बताउछाैँ,’ उनले भने, ‘अनुसन्धानकाे लागि साेधपुछ गर्ने काम चलिरहेको छ।’
