काठमाडौं। हाल देशभर पश्चिमी न्यून चापीय प्रणालीको प्रभाव रहेको छ। यसका कारण सुदूरपश्चिम, कर्णाली, लुम्बिनी र गण्डकी प्रदेशमा अधिकांश बदली रहनेछ, जबकि बाँकी प्रदेशहरूमा पनि सामान्य बदलीको अवस्था रहनेछ। जल तथा मौसम विज्ञान महाशाखाका अनुसार, सुदूरपश्चिम र कर्णाली प्रदेशका धेरै स्थानमा मेघ गर्जन र चट्याङसहित हल्का वर्षा भइरहेको छ।
महाशाखाका अनुसार, आज दिउँसो सुदूरपश्चिम, कर्णाली, लुम्बिनी र गण्डकी प्रदेशमा अधिकांश बदली रहनेछ भने बाँकी भूभागमा आंशिकदेखि सामान्य बदलीको अवस्था रहनेछ। कर्णाली र सुदूरपश्चिम प्रदेशका पहाडी भागका धेरै स्थानमा मेघ गर्जन र चट्याङसहित हल्का देखि मध्यम वर्षा हुने सम्भावना छ। लुम्बिनी, गण्डकी र सुदूरपश्चिम प्रदेशका तराई क्षेत्रका केही स्थानमा पनि मेघ गर्जन र चट्याङसहित हल्का वर्षा हुनसक्छ। यसैगरी, गण्डकी, सुदूरपश्चिम र कर्णाली प्रदेशका उच्च पहाडी र हिमाली भागमा हल्कादेखि मध्यम हिमपातको सम्भावना रहेको छ।
आज राति सुदूरपश्चिम र कर्णाली प्रदेशका पहाडी भू–भागमा साधारणतयादेखि अधिकांश बदली रहनेछ भने बाँकी प्रदेशका केही स्थानहरूमा आंशिक बदलीको अवस्था रहनेछ। महाशाखाले सुदूरपश्चिम र कर्णाली प्रदेशका उच्च पहाडी तथा हिमाली भागका धेरै स्थानमा हल्कादेखि मध्यम हिमपातको सम्भावना रहेको र यसले दैनिक जनजीवन, स्वास्थ्य, कृषि, सडक तथा हवाईउड्डयनमा प्रभाव पार्न सक्ने जनाउँदै ती सम्बद्ध सबैलाई सतर्कता अपनाउन अनुरोध गरेको छ।
