काठमाडौं – जल तथा मौसम विज्ञान विभाग, मौसम पूर्वानुमान महाशाखाका अनुसार हाल देशमा पश्चिमी वायु तथा स्थानीय वायुको आंशिक प्रभाव रहेको छ।
महाशाखाले दिएको जानकारीअनुसार अहिले कोशी प्रदेशसहित देशका पहाडी भूभागमा आंशिकदेखि सामान्य बदली रहेको छ, भने बाँकी भूभागमा आंशिक बदली रही मौसम मुख्यतः सफा रहेको छ। केही तराई क्षेत्रका स्थानहरूमा हल्का हुस्सु लागेको छ।
आज दिउँसो देशभर आंशिक बदली रही मौसम प्रायः सफा रहने अनुमान गरिएको छ। साथै, कोशी र गण्डकी प्रदेशका उच्च पहाडी तथा हिमाली भूभागका एक-दुई स्थानमा हल्का हिमपातको सम्भावना रहेको छ।
आज राति पनि देशभर आंशिक बदली रही मौसम मुख्यतः सफा रहने मौसमविद्को अनुमान छ।