बुटवल । भारतको महाकुम्भ मेला स्नान गरेर फर्किंदै गरेका रुपन्देहीको देवदहका तीर्थयात्री सवार गाडी दुर्घटनाग्रस्त हुँदा तीन जनाको मृत्यु भएको छ भने पाँच जना घाइते भएका छन्।
दुर्घटनामा देवदह नगरपालिका-९ निवासी ४५ वर्षीय गणेश खनाल, उनकी श्रीमती ३५ वर्षीया दीपा खनाल र ४० वर्षीया गंगा शर्माको ज्यान गएको जिल्ला प्रहरी कार्यालय रुपन्देहीले जनाएको छ।
प्रहरीका अनुसार तीर्थालु सवार गाडी भारत उत्तर प्रदेशको आजमगढ-वाराणसी सडकखण्डमा डिभाइडरमा ठोक्किएर दुर्घटनाग्रस्त भएको हो। भारतीय नम्बर प्लेट (युपी ५३ एफडी ४२८८) भएको उक्त गाडी अनियन्त्रित भई डिभाइडरमा ठोक्किँदा दुर्घटना भएको बताइएको छ।
दुर्घटनामा परी चालकसहित पाँच जना घाइते भएका छन्। घाइतेहरूमा देवदह-९ भलुहीकी कोपिला पोखरेल, उनका छोरा सुभम पोखरेल, आविष्कार पराजुली, यमकलादेवी मगर र गाडी चालक भारतीय नागरिक रितेश दुबे रहेका छन्। उनीहरूलाई प्रारम्भिक उपचारपछि थप उपचारका लागि गोरखपुर रेफर गरिएको छ।
फागुन ३ गते तीर्थयात्राका लागि देवदहबाट ३५ जना श्रद्धालु पाँचवटा गाडीमा भारत गएका थिए। नेपाल फर्कने क्रममा तीमध्ये एक गाडी दुर्घटनाग्रस्त भएको प्रहरीले जनाएको छ ।
