काठमाडौं । जल तथा मौसम विज्ञान विभाग, मौसम पूर्वानुमान महाशाखाका अनुसार हाल देशभरि पश्चिमी वायुको सामान्य प्रभाव रहेको छ।
महाशाखाले जारी गरेको पछिल्लो विवरणअनुसार, अहिले कोशी, बागमती, गण्डकी, र कर्णाली प्रदेशका पहाडी भूभागमा आंशिक बदली छ भने बाँकी क्षेत्रमा मौसम मुख्यतः सफा रहेको छ।
आज दिउँसो सुदूरपश्चिम प्रदेशसहित देशका पहाडी भूभागमा आंशिक बदली रहनेछ, भने बाँकी भूभागमा मौसम मुख्यतः सफा रहने अपेक्षा गरिएको छ। साथै, कोशी, गण्डकी, र कर्णाली प्रदेशका उच्च पहाडी तथा हिमाली क्षेत्रमा केही स्थानमा हल्का हिमपातको सम्भावना रहेको छ।
रातिको समयमा पनि कोशी, गण्डकी, र कर्णाली प्रदेशका पहाडी भागमा आंशिक बदली रहनेछ। बाँकी भूभागमा आंशिक बदलीदेखि मौसम सफा रहने अनुमान गरिएको छ। उच्च पहाडी तथा हिमाली भूभागका थोरै स्थानमा हल्का हिमपात पर्ने सम्भावना कायम छ।
महाशाखाले आगामी २४ घण्टाका लागि कोशी, बागमती, गण्डकी, कर्णाली, र सुदूरपश्चिम प्रदेशका उच्च पहाडी तथा हिमाली भूभागका केही स्थानमा हल्का हिमपात हुन सक्ने जनाएको छ।
यसैगरी, बिहानीपख तराईका केही भूभागमा हुस्सु तथा कुहिरो लाग्न सक्ने भएकाले दैनिक जनजीवन, स्वास्थ्य, सडक तथा हवाई यातायातमा आंशिक प्रभाव पर्न सक्ने सम्भावना छ। महाशाखाले सम्भावित असरबाट बच्न आवश्यक सतर्कता अपनाउन आग्रह गरेको छ।
