काठमाडौं । देशभर अहिले पश्चिमी न्यूनचापीय प्रणालीको आंशिक प्रभाव कायम रहेको छ। जल तथा मौसम पूर्वानुमान महाशाखाका अनुसार कोशी, गण्डकी र कर्णाली प्रदेशका पहाडी क्षेत्रमा आंशिक बदली रहँदा अन्य भूभागमा मौसम सामान्यतः सफा छ। मध्य र पूर्वी तराईका केही स्थानमा हुस्सु लागेको छ।
महाशाखाले दिएको जानकारीअनुसार दिउँसो कोशी प्रदेशका पहाडी भागमा आंशिकदेखि साधारणतया बदली रहनेछ। त्यस्तै, बागमती, गण्डकी र कर्णाली प्रदेशका पहाडी क्षेत्रमा आंशिक बदली रहँदा अन्य भूभागमा मौसम सफा रहनेछ। कोशी र गण्डकी प्रदेशका उच्च पहाडी तथा हिमाली क्षेत्रमा एक-दुई स्थानमा हल्का हिमपातको सम्भावना रहेको छ।
रातिको मौसम पनि लगभग यस्तै रहनेछ। कोशी, गण्डकी र कर्णाली प्रदेशका पहाडी भूभागमा आंशिक बदली रहँदा अन्य स्थानमा मौसम खुला रहनेछ। उच्च पहाडी तथा हिमाली भागका केही स्थानमा हल्का हिमपातको सम्भावना कायमै छ।
महाशाखाले आगामी २४ घण्टाका लागि मौसम पूर्वानुमान जारी गर्दै कोशी, गण्डकी र कर्णाली प्रदेशका उच्च पहाडी तथा हिमाली क्षेत्रमा हल्का हिमपातको सम्भावना औंल्याएको छ। बिहीबार बिहान तराईका केही स्थानमा हुस्सु लाग्न सक्ने भएकाले त्यसले दैनिक जनजीवन, स्वास्थ्य, सडक तथा हवाई उडानमा आंशिक असर पार्न सक्ने चेतावनी दिँदै आवश्यक सतर्कता अपनाउन आग्रह गरिएको छ।
