काठमाडौ – काठमाण्डौको साँखुमा अनियन्त्रित टिपर टहरामा ठोक्किँदा तीन जनाको मृत्यु भएको छ। द्वन्द्वपीडित तथा अपाङ्ग समाज संस्थाले सञ्चालन गरेको आश्रयस्थलमा टिपर ठोक्किँदा दुई बालक र एक वयस्कको ज्यान गएको हो।
शंखरापुर नगरपालिका-६, साँखु सलम्बुटारस्थित साँखु ब्रह्मखेल सडक खण्डमा आज बिहान ३:३० बजे बा २ क ६५८० नम्बरको टिपर अनियन्त्रित भई सडक किनारको टहरामा ठोक्किएको जिल्ला प्रहरी परिसर, काठमाण्डौका प्रवक्ता प्रहरी उपरीक्षक (एसपी) अपील राज बोहराले जानकारी दिनुभयो।
मृत्यु हुनेमा नाम थर नखुलेका बालकहरू आकाश र सुमन तथा ४५ वर्षीय हरिजन रहेको प्रहरीले जनाएको छ। सो कोठामा १० जना सुतिरहेका थिए भने संस्थामा कूल ६१ जना बस्दै आएका थिए।
टिपर चालक सिन्धुपाल्चोकका २५ वर्षीय सागर माझीलाई बौद्ध प्रहरीले नियन्त्रणमा लिएर घटनाबारे थप अनुसन्धान गरिरहेको प्रहरीले जानकारी दिएको छ ।
