काठमाडौं – नेपाल एलपी ग्यास उद्योग संघले १९ बुँदे माग राख्दै चरणबद्ध आन्दोलनको घोषणा गरेको छ। संघका अध्यक्ष शिवप्रसाद घिमिरेका अनुसार, यदि सरकारसँग भएका मागहरू सम्बोधन भएनन् भने फागुन १८ गते (मार्च 2, 2025) बाट देशभरका ५९ वटा एलपी ग्यास उद्योगहरू अनिश्चितकालका लागि बन्द गरिने बताएको छ।
संघले आन्दोलनका क्रममा माघ ३० गतेदेखि नेपाल आयल निगमबाट प्रोडक्ट डेलिभरी अर्डर (PDO) खरिद नगर्ने, फागुन ६ गतेदेखि इण्डियन आयल कर्पोरेसनबाट ग्यास लोड नगर्ने, र फागुन १२ गतेदेखि नेपालका लागि लोड भएर आएका ग्यास बुलेटहरू कुनै पनि भन्सार नाकाबाट नछुटाउने निर्णय गरेको बताइएको छ
ग्यास संघको यो कदमले बजारमा ग्यास अभाव हुने सम्भावना बढेको छ। हालसम्म उद्योगहरूबाट भरिएका सिलिन्डरहरू तुरुन्तै बिक्री भइरहेका छन्, तर ठूलो अभाव भने देखिएको छैन। तर, फागुन १८ पछि आपूर्ति पूर्ण रूपमा रोकिएमा ग्यास संकट गहिरिन सक्ने चेतावनी संघले दिएको छ।
