काठमाडौं । नेपाली कांग्रेस संसदीय दलको बैठक संघीय संसद्को हिउँदे अधिवेशनको तयारीका लागि आज पनि जारी रहेको छ। हिजो सुरु भएको बैठकमा संसद्को हिउँदे अधिवेशनमा उठाउनुपर्ने विषय, सरकारले जारी गरेका अध्यादेश र पार्टीको एकीकृत धारणा निर्माणबारे छलफल भइरहेको छ।
बैठकमा कांग्रेसबाट सरकारमा सहभागी भएका मन्त्रीहरूको काम, प्रभावकारिता, र प्रदर्शनको समीक्षा समेत गरिनेछ। सांसदहरूले मन्त्रीहरूका गतिविधिबारे आफ्ना धारणा राख्नेछन् भने मन्त्रीहरूले आफ्नो कार्यप्रगति र सांसदहरूको जिज्ञासामा जवाफ दिने कार्यक्रम रहेको छ।
आगामी माघ १८ गतेबाट संघीय संसद्को हिउँदे अधिवेशन सुरु हुँदैछ। पुस २६ गते बसेको मन्त्रिपरिषद् बैठकको सिफारिसमा राष्ट्रपति रामचन्द्र पौडेलले दुवै सदनका अधिवेशन आह्वान गरिसकेका छन्।
यस बैठकले संसद्को अधिवेशनमा पार्टीको भूमिका प्रभावकारी बनाउन ठोस रणनीति बनाउने र सरकारको कामलाई सशक्त बनाउने अपेक्षा गरिएको छ।
