नेपाल खोज खबर काठमाडौं- नेपाल सरकारले हालै जारी लगानी र व्यवसायमैत्री अध्यादेशप्रति निजी क्षेत्रका प्रमुख सङ्घ-संस्थाहरूले सकारात्मक प्रतिक्रिया जनाउँदै सरकारलाई धन्यवाद दिएका छन्।
प्रधानमन्त्री निवास बालुवाटारमा आयोजित कार्यक्रममा नेपाल उद्योग वाणिज्य महासङ्घ, नेपाल उद्योग परिसङ्घ, नेपाल चेम्बर अफ कमर्शलगायतका प्रतिनिधिहरूले उक्त अध्यादेशलाई स्वागतयोग्य भन्दै कोभिड-१९ पछि सङ्कुचित अर्थतन्त्रलाई पुनर्जीवित गर्न यसले महत्त्वपूर्ण योगदान दिने बताएका छन्।
महासङ्घका अध्यक्ष चन्द्रप्रसाद ढकाल, परिसङ्घका अध्यक्ष राजेशकुमार अग्रवाल, चेम्बर अफ कमर्शका अध्यक्ष कमलेश अग्रवाल, र उद्योग व्यवसाय महासङ्घका अध्यक्ष भगीरथ सापकोटाले अध्यादेशले लगानीमैत्री वातावरण निर्माणमा सहायक भूमिका खेल्ने विश्वास व्यक्त गर्दै सरकारलाई थप प्रभावकारी नियमावली तयार गर्न आग्रह गरे।
कार्यक्रममा प्रधानमन्त्री केपी शर्मा ओलीले सरकारको सदासयतालाई सकारात्मक रूपमा लिन सबैलाई आग्रह गर्नुभयो। उहाँले भन्नुभयो, “देश बनाउने सरकारको नीतिलाई स्वीकार्नुहोस्। सत्ता गठबन्धन विकास र सुशासनका लागि कटिबद्ध छ।” प्रधानमन्त्री ओलीले समृद्धि र सुशासनका लागि व्यावहारिक र अनुकूल नीति आवश्यक रहेको औंल्याउँदै आलोचनाभन्दा काममा जोड दिनुपर्नेमा जोड दिनुभयो।
निजी क्षेत्रका प्रतिनिधिहरूले पनि अध्यादेशले मुलुकको समृद्धिका लागि नयाँ ढोका खोल्ने विश्वास व्यक्त गर्दै ती व्यवस्थाहरूलाई प्रभावकारी बनाउन नियमावली र कार्यविधि आवश्यक रहेको धारणा राखे।
राष्ट्रपतिबाट पुस २९ गते जारी भएका चार अध्यादेशसँगै भूमिसम्बन्धी अध्यादेश पनि चाँडै आउने तयारीमा रहेको जानकारी दिइएको छ।
