- लुम्बिनी विकास कोषको उपाध्यक्षमा गायिका आनी छोइङ डोल्मालाई गरिएको नियुक्तिप्रति विभिन्न अभियानले विरोध जनाएका छन्।
- विवादित व्यक्तिलाई पवित्र धार्मिक संस्थाको नेतृत्व दिइनु सुशासनको सिद्धान्त विपरीत भएको भन्दै नियुक्ति खारेज गर्न माग गरिएको छ।
- उक्त निर्णय फिर्ता नलिए आन्दोलन गर्ने चेतावनी दिँदै स्वच्छ छवि र स्थानीय भावना बुझेको व्यक्तिलाई नेतृत्वमा ल्याउन आग्रह गरिएको छ।
लुम्बिनी – लुम्बिनी विकास कोषको उपाध्यक्षमा गायिका आनी छोइङ डोल्मालाई नियुक्त गर्ने सरकारको निर्णयप्रति राष्ट्रिय जेनजी नागरिक अभियान र लुम्बिनी बचाउ महाअभियानले विरोध जनाएका छन् ।
दुवै अभियानले नियुक्ति तत्काल खारेज गर्न माग गर्दै निर्णय फिर्ता नलिए आन्दोलन गर्ने चेतावनी दिएका छन् ।
गएकाे असोज ३० गते बसेको मन्त्रिपरिषद् बैठकले संस्कृति, पर्यटन तथा नागरिक उड्डयन मन्त्रालयको प्रस्तावमा डोल्मालाई लुम्बिनी विकास कोषको उपाध्यक्षमा नियुक्त गरेको थियो ।
राष्ट्रिय जेनजी नागरिक अभियानले आज विज्ञप्ति निकाल्दै कानूनी अनुसन्धानको घेरामा रहेको भनिएको व्यक्तिलाई पवित्र धार्मिक तथा सांस्कृतिक सम्पदाको विकास र व्यवस्थापन गर्ने निकायको नेतृत्व दिनु विधिको शासन र सुशासनको सिद्धान्त विपरीत भएको दाबी गरेको छ ।
यसैबीच लुम्बिनी बचाउ महाअभियानका अध्यक्ष अक्रम खानले पनि डोल्माको नियुक्ति खारेज गर्न माग गर्नुभएको छ ।
उहाँले लुम्बिनीको विकास, संरक्षण र प्रवर्द्धनका लागि स्थानीय भावना बुझेको, स्वच्छ छवि भएको र पारदर्शी व्यक्तिलाई नेतृत्वमा ल्याउनुपर्ने बताउनुभयो ।
