काठमाडौं, मार्च २८, २०२५ – म्यांमारमा शुक्रबार बिहान ७.७ म्याग्निच्युडको शक्तिशाली भूकम्प गएको छ। अमेरिकी भूगर्भ सर्वेक्षण (USGS) का अनुसार, भूकम्पको केन्द्र म्यांमारको सागाइङ शहरको उत्तर-पश्चिममा १६ किलोमिटर टाढा, १० किलोमिटर गहिराइमा रहेको थियो। यस भूकम्पका झट्का थाइल्याण्डको राजधानी बैंककसम्म महसुस गरिएको छ।
थाइल्याण्डमा भवन ढलेर ४३ जना फसे भूकम्पका कारण बैंककमा एक ३० तले भवन भत्किएको छ, जसमा ४३ जना फसेको आशंका गरिएको छ। घटनास्थलमा उद्धार कार्य जारी छ। बैंककका बासिन्दाहरू त्रासमा परेका छन्, केही भवनहरूमा दरार आएको छ भने एक निर्माणाधीन फ्लाईओभर भत्किएको रिपोर्ट छ।
म्यांमारको माण्डले क्षेत्रमा पुल भत्कियो म्यांमारको माण्डले क्षेत्रमा इरावडी नदीमा रहेको एवा पुल भत्किएको रिपोर्टहरू आएका छन्। भूकम्पका कारण यस क्षेत्रका संरचनाहरूमा व्यापक क्षति पुगेको आशंका गरिएको छ। उद्धार टोलीहरू प्रभावित क्षेत्रमा पठाइएका छन्।
पूर्वोत्तर भारत र चीनसम्म झट्का महसुस भूकम्पको प्रभाव म्यांमारसँगै भारतको पूर्वोत्तर क्षेत्र र चीनको केही भागहरूमा समेत महसुस गरिएको छ। मेघालय राज्यमा ४.० म्याग्निच्युडको भूकम्प मापन गरिएको छ, जसको केन्द्र पूर्वी गारो हिल्समा रहेको थियो।
क्षतिको विवरण आउँदै हालसम्म, भूकम्पका कारण भएको क्षति र हताहतीको पूर्ण विवरण प्राप्त भएको छैन। स्थानीय अधिकारीहरू उद्धार तथा राहत कार्यमा जुटिरहेका छन्। अस्पतालहरूलाई तयारी अवस्थामा राखिएको छ भने प्रभावित क्षेत्रका बासिन्दाहरूलाई सुरक्षित स्थानमा सार्ने काम भइरहेको छ।
थप जानकारी प्राप्त हुनासाथ समाचार अपडेट गरिनेछ। नेपालखोज खबर फलो गर्दै गर्नु होला