कर्णाली प्रदेशभर महिलाहरूमा हुने पाठेघरको मुखको क्यान्सर रोकथामका लागि एचपीभी (ह्युमन प्यापिलोमा भाइरस) खोप कार्यक्रम विस्तार गरिएको छ । राष्ट्रिय खोप कार्यक्रम अन्तर्गत प्रदेशका सबै जिल्लामा चरणबद्ध रूपमा नियमित एचपीभी खोप सेवा सञ्चालन हुन लागेको हो ।
वीरेन्द्रनगरमा आयोजित सञ्चारकर्मीहरूको अभिमुखीकरण कार्यक्रममा कर्णाली प्रदेशमा एचपीभी खोप सेवाको महत्व, कार्ययोजना र कार्यान्वयन अवस्थाबारे जानकारी गराइएको छ । कार्यक्रममा जिल्ला खोप समन्वय समिति प्रमुख गंगाराम सुनार, जिल्ला जनस्वास्थ्य कार्यालय प्रमुख करुणा भट्टराई, वीरेन्द्रनगर नगरपालिका प्रमुख मोहनमाया ढकाललगायत सरोकारवालाहरूको उपस्थिति थियो ।
कार्यक्रमका प्रशिक्षक डा। सुवास शर्माले एचपीभी खोप सुरक्षित, प्रभावकारी र दीर्घकालीन रूपमा जीवनरक्षक भएको स्पष्ट पार्दै समयमै खोप लगाउन सके पाठेघरको मुखको क्यान्सरको जोखिम अत्यन्तै न्यून गर्न सकिने बताउनुभयो । उहाँका अनुसार कर्णाली प्रदेशभर नियमित एचपीभी खोप सेवा फागुन १ गतेदेखि सुरु हुनेछ । खोप विद्यालय वा नजिकको स्वास्थ्य संस्थामार्फत उपलब्ध गराइनेछ ।
यो खोप कक्षा ६ देखि १० सम्म अध्ययनरत सबै छात्रा, विद्यालय बाहिर रहेका १० वर्ष उमेरका किशोरीहरू, साथै गत वर्ष खोप लगाउन छुट भएका कक्षा ७ देखि १० सम्मका छात्रा र ११ देखि १४ वर्ष उमेरका विद्यालय बाहिरका किशोरीहरूलाई निःशुल्क रूपमा प्रदान गरिनेछ ।
यसै क्रममा कर्णाली प्रदेशका हिमाली तथा दुर्गम जिल्लासमेत समेट्ने गरी खोप अभियान सञ्चालन गरिने स्वास्थ्य निर्देशनालय कर्णाली प्रदेशले जनाएको छ । कालिकोट जिल्लामा मात्रै १ हजार ८ सय १३ जना किशोरीलाई खोप लगाउने लक्ष्यसहित १ सय ३२ वटा खोप केन्द्र तोकिएको जनस्वास्थ्य अधिकृत कटक महतले जानकारी दिनुभयो । यस्तै लक्ष्यअनुसार हुम्ला, जुम्ला, मुगु, डोल्पा, जाजरकोट, रुकुम पश्चिम, सल्यान, दैलेख र सुर्खेतलगायत जिल्लामा पनि खोप केन्द्र निर्धारण गरिएको छ ।
कार्यक्रममा सहभागी डा। कमल भण्डारीले नेपालमा महिलामा देखिने क्यान्सरमध्ये पाठेघरको मुखको क्यान्सर प्रमुख समस्याका रूपमा रहेको उल्लेख गर्दै एचपीभी खोपले यस रोग नियन्त्रणमा क्रान्तिकारी भूमिका खेल्ने बताउनुभयो । उहाँले अभिभावक, विद्यालय र स्थानीय तहको सक्रिय सहयोगबिना लक्ष्य पूरा गर्न कठिन हुने भन्दै सबैलाई अभियानमा सहभागी हुन आग्रह गर्नुभयो ।
स्वास्थ्य निकायका अनुसार कर्णाली प्रदेशजस्तो भौगोलिक रूपमा चुनौतीपूर्ण क्षेत्रमा एचपीभी खोप अभियान महिलाको दीर्घकालीन स्वास्थ्य सुरक्षातर्फको ऐतिहासिक कदम हो । लक्षित समूहका किशोरी तथा अभिभावकहरूलाई खोप कार्यक्रममा ढुक्क भएर सहभागी हुन आग्रह गरिएको छ ।
