अर्घाखाँची,— अर्घाखाँची जिल्लाको भुमिकास्थान नगरपालिका–७ छिन्दीखोला क्षेत्रमा विद्यार्थी बोकेको डबल क्याब दुर्घटना हुँदा चालकको मृत्यु भएको छ भने १५ जना घाइते भएका छन्।
आज मिति २०८२ साल पौष ११ गते बिहान करिब ११:३० बजे धनचौर–नुवाकोट भित्री सडकखण्ड अन्तर्गत जनजागृति माध्यमिक विद्यालय धनचौरबाट राष्ट्रपति रनिङ शिल्ड प्रतियोगितामा सहभागी हुन नुवाकोटतर्फ जाँदै गरेका विद्यार्थीहरू बोकेको लु २ च ५१७९ नम्बरको डबल क्याब घुम्तीमा ब्याक हुन गई अनियन्त्रित भई सडकबाट करिब ५०–६० मिटर तल खस्न जाँदा दुर्घटना भएको हो।
दुर्घटनामा सवार १८ जना मध्ये १५ जना घाइते भएका थिए। घाइते सबैलाई तत्काल उपचारका लागि जिल्ला अस्पताल सन्धिखर्क पठाइएको थियो। उपचारकै क्रममा चालक भुमिकास्थान नगरपालिका–१० पाकु निवासी ४५ वर्षीय रुद्र बहादुर पुन मगरको टाउकोमा गम्भीर चोट लागेपछि दिउँसो १२:२० बजे चिकित्सकले मृत घोषणा गरेका हुन्। घाइतेमध्ये ६ जनाको अवस्था मध्यम र अन्यको अवस्था सामान्य रहेको जनाइएको छ। मध्यम घाइतेहरूमा १७ वर्षीया वर्षा राना, १६ वर्षीय विप्लव पुन, ४० वर्षीय शेषकान्त गैरे, १६ वर्षीया अमिसा खनाल, १५ वर्षीय विकास पेन्नी र १५ वर्षीया रितु घर्ति मगर रहेका छन्। विप्लव पुनसहित ३ जनालाई थप उपचारका लागि बुटवल रिफर गरिएको छ।
अन्य घाइतेहरूमा सिम्रन घर्ति मगर, रञ्जिता थापा, वर्षा खनाल, अस्मिता नेपाली, अमृता नेपाली, आयुष नेपाली, वसन्ता थापा र सुन्दर घर्ति मगर रहेका छन्, जसको अवस्था सामान्य रहेको अस्पतालले जनाएको छ। दुर्घटनाको जानकारी पाएलगत्तै अस्थायी प्रहरी पोष्ट धनचौरबाट प्रहरी वरिष्ठ हवल्दार स्वस्तिक गौडेलको कमाण्डमा ४ जना तथा जिल्ला प्रहरी कार्यालय अर्घाखाँचीबाट प्रहरी निरीक्षक फल बहादुर तामाङको कमाण्डमा ९ जनाको टोली घटनास्थलमा खटिएको थियो। घटनास्थल अस्थायी प्रहरी पोष्ट धनचौरबाट करिब ७–८ किलोमिटर पश्चिम पर्ने दुर्गम क्षेत्रमा रहेको छ। दुर्घटनाको कारणबारे प्रहरीले थप अनुसन्धान गरिरहेको जनाएको छ।
