काठमाडौ – नेकपा (एमाले) का महासचिव शंकर पोखरेलले ऊर्जा, जलस्रोत तथा सिँचाई, भौतिक पूर्वाधार तथा यातायात र सहरी विकास मन्त्री कुलमान घिसिङको नैतिकतामाथि प्रश्नचिह्न उठाएका छन्।
मन्त्री घिसिङले आगामी निर्वाचनमा भाग लिने घोषणा गरिसकेको र आफ्नै पहलमा दल दर्तासमेत गरिसकेकाले गैरदलीय सरकारमा बस्न नमिल्ने तर्क महासचिव पोखरेलले गरेका हुन्।
‘प्रधानमन्त्री सुशीला कार्कीले चुनावका लागि गैरदलीय सरकार बनाएको दाबी गर्ने तर स्वयंको पहलमा पार्टी गठन गरी चुनावमा सहभागी हुने घोषणा गरिसकेको व्यक्तिलाई मन्त्री पदमा राखिराख्नु उचित हुन्छ?,’ उनले प्रश्न गरेका छन्।
प्रधानमन्त्रीले अविलम्ब घिसिङलाई मन्त्री पदबाट बिदा गर्नुपर्ने पोखरेलले बताएका छन्।
‘यदि यस्तो व्यक्ति मन्त्री पदमा बसिरहनु नैतिक दृष्टिले उपयुक्त हुँदैन र प्रधानमन्त्रीको प्रतिबद्धतासँग मेल खाँदैन भने, अविलम्ब मन्त्री पदबाट बिदा गर्नुपर्ने होइन र!,’ उनको भनाइ छ।
