- नवलपुरको गैँडाकोटमा स्कुल बस र मोटरसाइकल ठोक्किँदा एक युवकको मृत्यु भएको छ।
- दुर्घटनामा गम्भीर घाइते भएका २६ वर्षीय मोटरसाइकल चालक राजु बापाको उपचारको क्रममा ज्यान गएको हो।
- प्रहरीले बस र चालकलाई नियन्त्रणमा लिएर घटनाबारे थप अनुसन्धान अगाडि बढाएको छ।
गैँडाकोट, नवलपुर। नवलपुरको गैँडाकोटमा स्कुल बस र मोटरसाइकल एकआपसमा ठोक्किँदा एक युवकको मृत्यु भएको छ।
सोमबार बिहान करिब ८ः३० बजे गैँडाकोट नगरपालिका–५, कुसुमपाटस्थित भित्री सडकखण्डमा गैँडाकोट इङ्लिस स्कुलको बस र मोटरसाइकल ठोक्किएका थिए।
कालिकाचोकबाट श्रीराम प्यालेसतर्फ जाँदै गरेको ग १ ख ३९७० नम्बरको बस र विपरीत दिशाबाट आउँदै गरेको ना.५८ प ४५७२ नम्बरको मोटरसाइकल ठोक्किँदा मोटरसाइकल चालक गैँडाकोट–६ निवासी २६ वर्षीय राजु बापा गम्भीर घाइते भएका थिए।
टाउकोमा चोट लागेका उनलाई उपचारका लागि भरतपुरस्थित नयाँ मेडिकल कलेज लगिएको थियो। उपचारकै क्रममा बिहान ९ः३४ बजे चिकित्सकले मृत घोषणा गरेको प्रहरीले नेपाल खोज खबर लाई बताएको हो ।
दुर्घटनापछि प्रहरीले दुवै सवारीसाधन र बस चालक गैँडाकोट–१, धारापानी निवासी ५१ वर्षीय मनिराम थापामगरलाई नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।
