- देशका विभिन्न जिल्लामा वर्षाका कारण मुख्य सडकखण्डहरू अवरुद्ध भएका छन्।
- नुवाकोटको टोखा-छहरे सडकमा राति सवारी आवागमनमा रोक लगाइएको छ।
- पहिरो र बाढीले रसुवाको पासाङ ल्हामु राजमार्ग लगायत अन्य सडकमा क्षति पुगेको छ।
वर्षाका कारण देशका विभिन्न जिल्लाका सडकखण्ड अवरुद्ध भएका छन्।
नेपाल प्रहरीका अनुसार नुवाकोट, रसुवा, मनाङ, गुल्मी, म्याग्दी, मुस्ताङ, नवलपरासी पूर्व र लमजुङका विभिन्न सडक प्रभावित भएका हुन्।
नुवाकोटको टोखा-छहरे सडकखण्डमा अत्यावश्यक सेवाबाहेक अन्य सार्वजनिक तथा निजी सवारी राति १० बजेदेखि बिहान ५ बजेसम्म सञ्चालनमा रोक लगाइएको छ।
रसुवाको पासाङ ल्हामु राजमार्ग पूर्ण रूपमा अवरुद्ध छ। त्रिशुली नदीको कटान र बाढीका कारण सडकको ठुलो भागमा क्षति पुगेको प्रहरीले जनाएको छ। स्याफ्रुबेंसीसम्म पुग्न काठमाडौं-टोखा-छहरे-विदुर हुँदै धुन्चे-स्याफ्रुबेंसीसम्मको सिंगल लेन कच्ची सडकलाई वैकल्पिक बाटोका रूपमा प्रयोग गर्न सकिने प्रहरीले जनाएको छ।
त्यस्तै, मनाङको बेँसीसहर-खाङसार, गुल्मीको कालीगण्डकी करिडोर, म्याग्दीको बेनी-जोमसोम, मुस्ताङको जोमसोम-कोरला, नवलपरासी पूर्वको कालीगण्डकी करिडोर र लमजुङको मध्यपहाडी लोकमार्ग पनि विभिन्न स्थानमा अवरुद्ध भएका छन्। पहिरो, लेदो, बाढी र सडक भासिएका कारण यी सडकमा आवागमन प्रभावित भएको प्रहरीले जनाएको छ।
